ENTRE EN HAINAUT

le ban de par le prouvost de la ville, que sur la teste nuls ne vidast hors de la ville sans commandement. Sy gardèrent le porte Cambrisienne, où celle estourmye estoit, le sire de Mastaing et le sire de Floyon.

Quant le connestable de Franche et sa route eurent fait leur emprises et il virent que nuls ne venoit , il s'en retournèrent tout bellement devers les Marlis et les ardirent, et puis la ville d'Asnoy, et s'en retournèrent devers le duc qui se commenchoit à deslogier pour traire devers Maing et Fontenelle. Là s'en vinrent ly Franchois logier celle tierche nuit. A l'endemain bien matin, il s'en partirent , et eult le duc de Normendie conseil que il s'en retournast devers Cambray, et là passèrent l'Escaut pour entrer en Ostrevant et pour tout ardoir le pays. A son département de la ville de Maing, où il estoit logiés, ardirent les Franchois Denaing et l'abéie de Fontenelles, où madame sa tante estoit logie ; mais elle se tenoit à Valenchiennes, de laquelle chose le duc fut durement blâmé, et sy ardirent les Franchois Trit, Monchiaulx, Pourinchiaus et tout le pays de Haynau ou chemin de Cambray. Sy s'en vint le duc logier en la cité de Cambray, et là se tint ung grant tamps pour savoir quel part il se trayroit.

En che tamps s'en vint Jaques de Hartevelle et se party de Gand atout grant foison de Flamens, et avoit entention de venir mettre le siège devant Tournay. Sy senefia son emprise au conte de Sallebrin, qui pour le tamps se tenoit en garnison en la ville d'Ypre, et que il y voulsist estre. Le conte de Sallebrin ne volt mie désobéyr, mais s'apresta du plus tost que il peult, et cueilla tous ses compaignons, où il povoit avoir soixante lanches, et se mist au chemin, et cnraena les arbalestriers de la ville d'Ypre avec luy, et