DU COMTE DE SALISBURY

le Croix, qui toudis se doubtoit, ala derière, syque, osy trestot que il perchut cheux de Lille, il retourna son coursier et se féry parmi ung grans mares et se bouta en ung vivier et entre rossiauls et glamons. Là fu tout le jour jusques au vespre qu'il ysy hors à la nuit, au mieulx qu'il pot, et se sauva bien, et le virent cheux de Lille partir, mais point ne le poursieuwirent ; car il ne savoient pas que che fust messire Wafflars, et entendirent à envayr et assalir le conte de Sallebrin et sa route, qui furent tantost avironnet de plus de mille. Lors virent bien que deffense ne leur valloit riens. Sy se rendirent, sauves leur vies. Ensy les prirent cheux de Lille, et les menèrent dedens la ville à grant joie ; et là avoit ung jone escuier, nepveu au pape Bénédic qui lors régnoit pour le temps, qui s'apelloit Raimraons, qui là estoit venus pour son corps avanchier. Sy estoit chis très-richement armés. Sy s'esmeut entre les communs, qui pris l'avoient, dissençion pour sa prise, syque par envie et mauvaiseté il fut ochis, quoyque le conte de Sallebrin et les riches hommes de la ville en furent durement courouchiés, mais amender ne le peurent. Ensy de cheulx de Lille fut pris messire Guillame de Montagut, conte de Sallebrin, et depuis fu mené en prison à Paris devers le roy Phelippes, qui le veult avoir et veoir, et qui de sa prise sceult trop grant gret à cheulx de Lille.

Ches nouvelles seut Jaques de Hartevelle ,qui se tenoit au Pont-de-Fier entre Audenarde et Tournay. Sy en fu sy courouchiés, quant il le sceut, qu'il en rompy son voiage et son emprise, et se retrait à Gand, et donna congiet à tous les Flamens pour celle fois.

Or parlerons du duc de Normendie , qui estoit retr^is en la cité de Cambray. Sy avoit envoyet grans gens d'armes à Douay , lesquels alèrent en Ostrevant et y ardirent plus de quarante villaiges , et ossy cheulx de le