JEAN DE MONTFORT PROCLAMÉ DUC DE BRETAGNE

Et tout che que le duc en pensoit , il en avint ; car osy tost que le conte de Monfort peult savoir que le duc son frère estoit mors , il vint en Bretaigne , et s'en vint en Nantes, qui est une des plus souveraynes cités de Bretaigne, et fist tant aus bourgois et à cheux du pais d'entour que on le rechut à seigneur , comme le plus prochain oir du duc son frère , qui trespassés estoit , et \y firent trestout serment et homage comme au duc de Bretaigne, et [ot] le féaulté des bourgois de Nantes et de cheux du pais d'environ. Il alla à la contesse , sa femme , qui seur germaine estoit du conte Loys de Flandres , laquelle dame avoit bien le cuer d'omme et de lion , et eurent consail ensamble que ils tenroient une grant feste et solempnelle en la cité de Nantes et là veroient leurs amis. Se fut senifiet par tout les chités , les seigneuries et les bonnes villes de Bretaigne , en mandant que nuls ne volsist fallir qu'il ne fust à ceste feste.

En che terme pendant et le feste atendant , le conte de Monfort se party de Nantes atout grant foison de gens d'armes , et s'en alla devers la cité de Limoges , où le trésor de son frère estoit. Quant il fu parvenu jusques à là, il s'acointa si bien des bourgois de Limoges qu'il le rechurent à seigneur et lui firent féaulté et homaige et lui ensengnèrent le trésor du duc son frère, qui estoit moult grant. Sy le prist et cherga , et fist tout enporter avec lui , et s'en vint à Nantes , et dist à sa femme comment il avoit bien esploitiet. De ceste chose eult la dame grant joie.

Or avint le jour que le mandement estoit de celle feste, qui se devoit tenir à Nantes , mais nuls n'y vint de tous ceulx qu'il avoit priet, ne mandés , fors seulement ung