H6 SIÈGE DE NANTES

Monseigneur Charle de Blois s'agenoulla devant le roy son oncle , et dist : « Monseigneur , vous dittes bien , et « Dieu le vous puist mérir et rendre ; car tous chils « proufis et avanchement me vient de vous. »

Là pria ledit messire Charle les seigneurs , Tun après l'autre , que il le volsissent aidier à reconquerre son hiretaige ; et tous lui acordèrent.

Depuis ne demoura gaires de temps que messire Charles se party de Paris et prist le chemin d'Angiers ; et vinrent là après le conte d'Allenchon, le duc de Normendie, le duc de Bourgogne, le duc de Bourbon, le conte de Tancarville, le connestable de France , le sire de Coucy , le sire de Craon , le sire de Suilly et grant foison de barons de France , et estoient bien , quant tous furent venus et asamblés , six mille hommes d'armes et vingt mille d'autres gens , parray les Genevois qui estoient desoubs messire Charles Grimaulx et messire Hoste Doire ; et fut mariscaulx de tout l'ost ung très-bon et hardy chevalier , qui s'appelloit messire Loys d'Espaigne. Sy se partirent d'Angiers à très-grande compaignie de gens d'armes , et allèrent devers Bretaigne , et vinrent devant ung trèsfort chastel qui estoit de la partie du conte de Monfort. Sy l'aségèrent et y livrèrent pluiseurs assaus , ançois que il le peuissent avoir , et se tint moult fort , et en le fin il l'eurent par composition , et se partirent sauf leur vies , et messire Charle eult le saisine dudit chastel : se y mirent garnison de gens et de vivres. Puis passèrent oultre et vinrent devant une ville qui est à quatre lieues de Nantes, et l'appelle-on Quarquefoure : sy le prinrent de forche , car elle se tenoit de la partie du conte , et fu toute arse , et y eut mort grant foison de cheulx de la