PÉRILS

Quant che vint par nuit, que les Escochois tous lassés et travilliet furent retrais à leur logis , le cappitaine du Noef- Chastiel s'avisa que il resvilleroit les Escochois. Sy fîst armer tous les compaignons de là dedens et monter à cheval, et estoient environ deux cens, et otant qui gardèrent le porte. Sy chevaucèrent ces Englès coiement jusques à tant que il vinrent en l'ost, et trouvèrent les Escochois tous endormis, sans faire gait. Sy se férirent en l'ost et en criant leur cry, en abatant et ochiant là Escochois à forche, et allèrent adont sy avant que il vinrent au logis du conte de Mouret. Là ot grant hustin, et fut le dit conte prins en sa tente, et pluiseurs de ses gens mors, et s'en retournèrent devers le Noef-Chastiel et rentrèrent dedens sans nuls dangiers, anchois que les Escochois furent estourmis. Quant les Escochois seurent le prise du conte de Mouret, sy furent comme tous foursenés, et passèrent celle nuit à grant malaise ; et, quant che vint au matin, il s'armèrent et se mirent en ordonnanche pour assaillir , et assallirent le Noef-Chastiel par pluiseurs assaulx, et dura ledit assault par quatre jours, mais riens n'y firent ; et lorsque il virent que riens n'y povoient faire , il se partirent et alèrent devers Carduel en Galles, car par là volloient-il retourner en leur païs.

Assés près de là en le marche de Northombrelant et de Galles siet le chastel de Sallebrin, dont le conte estoit sires, qui estoit prisoniers à Paris, sycommevous avés chy-dessus oyt ; mais dedens son chastiel estoit madame sa femme, l'une des plus belles dames du monde, et le gardoit messire Guillame de Montagut, nepveu audit conte de Sallebrin, et le roy d'Escoche et tout son ost prist son chemin par devant ledit chastiel, sy chergiet d'or et d'argent et de tous autres pillaiges qu'il avoit conquis en la contrée de Northombre-