SIÈGE DE NANTES

Le roy d'Engleterre, qui tiroit à trouver raessire Charles de Blois , son cousin , pour combatre à luy ou l'aségier dedens une ville, entendy que messire Charles estoit dedens Nantes , et dist le roy que il yroit celle part , et prinst congië à ses gens, qui estoient devant Rennes, et les laissa à leur siège , et puis se party et esploita tant par ses journées que il vint devant Nantes et l'aséga de l'un des lés ; car la ville est sy grande que il fauroit bieaucop de gens pour l'aségier. Toutesfois il entendy que messire Charles de Blois estoit dedens. Sy envoya ses hiraulx devers luy pour requérir bataille. Messire Charles n'eut pas en consail de respondre au roy pour accepter journée de bataille ; mais dist au hirau que le roy n'estoit pas bien consillié, quant il se faisoit partie pour celui qui nul droit n'y avoit as hiretaiges de Bretaigne, et que che estoit tout cler , et ne cuidoit riens avoir meffait au roy , par quoy il luy flst guerre. Le roy d'Engleterre de ceste response ne se tint mies bien content , et fist assallir ses gens par pluiseurs fois la cité de Nantes et courir tout le pais de environ par son marisal , mais à ladite cité ne pooit-il rien conquerre ; car elle estoit bien gardée de bonnes gens d'armes. Sy se avisa le roy d'Engleterre que il lairoit là une partie de ses gens, et atout les autres il yroit courre le païs et aprendroit à congnoistre la duché de Bretaigne. Sy ordonna à demorer devant Nantes le conte d'Arondel , le conte de Wervich , le conte de Huntitone , le sire de Persy , le sire de Moutbray , le sire de Felleton , le sire de Luzi et M hommes d'armes et II™ archiers , et puis passa oultre, ardant et exillant le pais , et quant il vint devant la ville de Dignant en Bretagne , là s'aresta et y mist le siège. Et dedens la ville de Dignant estoit capitaine de par messire Charles de Blois messire Pierre Porteboef , ung vaillant chevalier , et avoit avec luy pluiseurs compaignons ables et vailîans.