PRISE DE DINAN

Adont fut grant nouvelle parmy le pais de Bretaigne de ceste avenue , et en fist le roy d'Engle terre grant joie au siège de Dignant. Adont le roy fist assallir la ville de Dignant moult fort et par plusieurs assaulx. ToutefFois le roy fist entrer grant foison de gens d'armes et archiers en batelès, et allèrent jusques au pallis par les fossés , et adont firent tant par forche que il rompirent le pallis et entrèrent en la ville et chassèrent tout devant eulx. Tous les bourgois furent durement eiFraés, quant il virent les Englès en leur ville. Adont s'enfuy chascun au mieulx que il pot, et enmenoient femmes et enfans, et laissèrent tout ; car il n'avoient mie loisir de le prendre, ne porter à sauveté. Messire Pierre Portebuef et les sauldoiers qui là estoient de par messire Charles de Blois, se recuellèrent en la place du marchiet, avec eulx aucuns bourgois de la ville , et se combatirent une espace as Englès ; mais il ne peurent durer contre la puissance du roy, car ceulx qui estoient entré par les fossés en la ville, vinrent as portes et les ouvrirent , par quoy le roy et toutes ses gens entrèrent dedans sans dangier. Ensy fut la ville de Dignant en Bretaigne conquise , et y ot de mors et de prins grant foison , et y eult grant butin ; car elle estoit durement bonne en marchandise. Quant les Englès en eurent fait leur vollenté, il l'ardirent en partie, et puis se party le roy, et vint derechief au siège devant Venues où son cousin le conte d'Erby et ly barons d'Engleterre estoient.

Bien estoit infourmés le roy Phelippes du roy d'Engleterre et de la puissanche que il avoit en Bretaigne pour conforter la contesse de Monfort et comme il avoit aségié Vennes, Nantes, Rennes et Dignant, et estoit tout le plat païs par luy et par ses gens ars et essilliet , dont moult