JOUTES DE WINDSOR

roy Phelippe , et s'aquita bien , et envoia dix mille florins à Bruges dedens son terme, et ne peult aller en personne, car il s'acouça au lit, dont il mourut. Dieu en ait lame ! Ensy fina messire Henry de Lion , dont la contesse de Monfort fut moult lie ; car che luy estoit ung grant ennemy en Bretaigne. Or retournerons-nous au roy d'Engleterre.

Le roy d'Engleterre tint ens ou chastiel de Windesore sa faste moult grande et moult noble , et y eult plus de trois cens chevaliers joustant et bien quatre cens dames et demoiselles , et fu la feste bien ordonnée , et fourjousta de cheulx de dedens messire Franque de Halle , et de cheulx de dehors le conte des Mons en Allemaigne et un escuier d'Escoche, qui se nommoit Alexandre de Ramesay , et de cheulx dedens, le prinche de Galles ; et dura ceste feste quinze jours , et y eult moult noble feste.

La feste durant vinrent nouvelles au roy d'Engleterre de pluiseurs païs , et par espésial de Gascoingue ; car à celle feste furent ly sire de Labreth, le sire de Muchident, le sire de Pumers , le sire de Lespare , qui remonstrèrent au roy comment son païs d'Acquitaine se perdoit et que chils de Bourdeaulx estoient en trop grant dangier ; car le conte de Laille , le conte de Comminges , le viceconte de Carmaing et pluiseurs autres de la partie du roy de France se tenoient à Bregerach et estoient mestre et signeur des camps et de la rivière , et ne pooit nuls aler , ne chevauchier, qui se nommoit englès , qui ne fust pris ou tué, sicques ches dessus dit Gascons remonstrèrent ces besongnes au roy d'Engleterre et lui prièrent , là où il n'y pooit venir , que il leur volsist baillier pour capitaine et