LA VISION DU ROI OLLER1CH

d'après le manuscrit de la bibliothèque de Sainte-Geneviève.

— V. p. 341, note I, —

Et lors ne demoura gueres que une si très grande faulte le print qu'il perdi toute congnoissance et en ce point fu long espace. Toutefois il revint à soy, puis jetta ung merveilleux souspir et s'escria à haulte voix en disant : « 0 bon Dieu, qu'ay je vëu ? » Et incontinent il commanda que tous widassenthors de sa tente exepté son confesseur seulement. Et quant tous furent widiés, le roi dist : « Ha, beau père, durant la faulte que j'ay

i maintenant eue, m'est venue une merveilleuse vision, car il me

à l'environ du quel avoit une merveilleuse clarté, estoit devant moy. Et quant je l'eus longuement regardé, je lui demanday très paoureusement qui il estoit. Et il me respondit très bénignement : « Je suis Olphe qui par la miséricorde de Jhésucrist suis saulvé et sanctifié à Drouphèle,en ton royaume de Norwèghe. Et pour ce que, par cy devant, maintes fois, par grant dévotion, tu m'as requis et aouré et fait plusieurs biens à mon église, pour ceste cause j'ay prié Dieu dévotement qu'il me donnast grâce et license, devant ta mort, de toy advertir à ton grant besoing de v péchiez publiques, énormes et crueulz, que tu as commis et perpétrés à son grant desplaisir et au grant péril de ton âme, desquelz péchiés tu ne te pues excuser ne prétendre ignorance, car ilz sont notoires et au préjudice de tous. Et te di pour vérité que de ces v péchiés, tu t'en es trop légièrement passé en confession et encore pis en repentance et satisfaction, dont ton âme est fort chargie, et le flateur ton confesseur qui s'est mal acquittié et acquitte envers toy. Et saches que tu dois avoir moult grant repentance de tous péchiés qui sont contre la chose publique et à la destruction et préjudice du menu peuple et en dois faire restitution et pénitance publique, dont tu n'as riens fait, mais continué de mal en pis. » Et après ces parolles, le roy se confessa moult dévotement et de cuer contrit de tous ses péchiés et desfautes, espécialment des v péchiés horribles qui s'ensivent.

« Le premier est que en pluseurs notables églises, cathédrales et collégiales, de nos royaumes, par force, puissance, menaces et malicieuses pratiques j'ay empeschié les élections deuement et canoniquement faites par la voix du Saint Esprit, et en débouté les esleus, gens de bonne vie et prouffitable, et en lieu d'iceulx y commis personnes à ma voulenté, en alant notoirement à l'encontre de l'intencion de mes prédécesseurs, fondeurs des églises, qui ordonnèrent jadis en leur fondacion que, après leur mort, par juste élection et bonne estructine , les suppotz des églises eslëussent leurs pasteurs, et sans avoir en riens regart au serment que j'en ay fait à mon couronnement,

où j'ay juré solennellement de garder les églises de mes royaumes en leurs honneurs, franchises et libertez. Et encore les bénéfices qui sont à ma coUacion à cause de mes prérogatives et haultesse de mes royaumes et seignouries, je les ay données voluntairement sans avoir regart à la valeur des personnes, aux bons clercs, ne à ceulx de noble lignie, de bonne vie et honneste.

« Le second péchié est des deffautes que j'ay commises en la justice que Dieu m'a baillie en garde. Car je n'ay pas pugni les mauvais, crueulx, félons et tenseurs, selon leurs démérites, mais les ay rcspités,par argent ou prières de gens de ma court, en laissant fouler les preudommes et innocens. Et qui pis est, vendu ou engaigié à argent comptant, ou par vicieuses requestes disposé de mes offices de justice et y commis gens convoiteux et rapineux, sans conscience, ne crémans Dieu, ne aussi soy congnoissans en l'exercite des offices. Et qui pis est, les ay laissié convenir sans les corrigier ne reprendre de leurs desfautes et abus. Et ay délaissié les preudommes de mes royaumes, saus avancement ne provision d'estat ne d'offices qui bien y eussent esté séans ; et maintes fois ay empeschié et mis en delay par mes mandemens et lettres closes l'exécution de bonne et droiturière justice et souffert les mangeries, pratiques et corruptions de mes officiers et gens de ma court, sans les en riens pugnir ne reprendre, laquelle chose est desplaisant à Dieu et au très grant dommage et préjudice de mon peuple.

« Le tiers péchié est des crueles et horribles guerres que pluiseurs fois j'ay entreprises contre princes crestiens et communaultés de bonnes villes, la plus grant part à l'occasion de mes convoitises, orgueulx et vaines gloires, desquelles consellez ou questions je n'ay voulu pou ou riens croire ne user du conseil des anciens ne des estas de nos royaumes. Ains les ay conduises voluntairement à ma testée et opinion, par le conseil de flateurs, convoiteux et rapineux, sans avoir regart à l'effusion du sang crestien ne prendre pité ne compassion du povre peuple qui porte et soustient la dureté et cruaulté des guerres.

Le ime péchié est des grandes et sumptueuses tailles, aydes, tonlieux, mengeries et nouvelités que maintes fois j'ay mis sur mon povre peuple, à la vérité plus pour les conduites de mes plaisances, prodigalités et oultrages et pour enrichir mes mignotz et flateurs que pour la conservation et deffense de mes subgés. Et en maintes manières ay malicieusement coulouré et paré mes requestes, aucunesfois sous umbre de mes guerres et aultres soubtilz moyens, pour induire Je peuple à parvenir à mes intençons, et ay séduit pluseurs à prattiquier mes demandes, les uns par dons et les autres par menaces.

Le ve péchié est que, par convoitise désordonnée, j'ai desfailly ou fait de mes monnoyes, par les empirances que pluseurs fois y ay fait malicieusement, ou très grant préjudice de mes subgés et de la chose publique. Car sans faire nouveau pié ne sans le segnelîer au peuple, y ay fait empirance dont nul ne se donnoit à garde excepté moy et les prochains de ma personne, chargeurs et billonneurs qui y ont prins de mervilleux prouffis à la destruction de mon peuple, et si grand dommage leur aporte que je congnois très bien que, pour ung denier qui en est venu à mon prouffit, mon peuple en a aporté vi ou vil fois autant de dommage. Laquelle chose j'ay fait contre le serment que je fis à mon couronnement où je juray solompnellement que durant mon temps je entretenroye mes monnoies sans quelque empirance. »

Et quant son confesseur l'ot bien entendu, il commença à plourer tendrement et batre sa coulpe. Adont lui demanda le roy : « Beau père, qu'avés-vous ? » Et il lui respondy : « 0 mon bon seigneur , j'ay bien cause de dueil, car je congnois par la révélation que vous avés eue que j'ay deffailli envers Dieu, mon créateur, et envers vous, en tant que je ne vous a,y point par cy devant deuement reprins de vos péchiés, ains par flaterie m'en suis passé légièrement. Je le congnois, certes, vous ne moy ne le povons ignorer , car cent mille et cent mille de vos subgetz le scèvent, comme vous et moy, lesquelz ont paciamment souffert et enduré , à leur grant

desplaisir, vos derrisions et convoitises. Et pour Dieu, mon chier seigneur , si chier qne vous avés le salut de votre âme, priés en à Dieu mercy de bon cuer et lui offres amendement de vos desfautes et en faittes ainsi que le glorieux saint monseigneur saint Olphe vous a de sa grâce adverty et chargié. Car quant je y pense bien, je n'i sauroye riens amender ne corriger. Promettes aussi à Dieu que, s'il vous donne grâce d'escaper de ceste maladie, que jamais en telz péchiés ne renquerrés et que vous en ferés tele restitution que luy et tous vos bons subgetz en seront contens. Mon très chier seigneur, soyés certain que la vision que avés eue n'est pas advision seulement, mais révélacion divine que vostre bon créateur Jhésucrist vous a volu faire devant vostre mort, à la prière du glorieux monseigneur saint Olphe ouquel avez tous jours eu granc fiance. »