PROLOGUE

COMMENT LACTEVR FVT REBOVTE DV TEMPLE DE VENVS.

Avx paroles de larchiprestre Genius, plusieurs personnages de ieunesse Gallicane et Françoise, esrauz et entalentez daller à loffrande, sans attendre la fin du sermon, comme pleins de fureur amoureuse, contraingnirent ledit * prédicateur de syncoper sa collation (1) : car par ardeur tumultueuse et farouche, tout ainsi que silz se deussent entrebatre, chacun sauança qui mieux, mieux, tendant de baiser les reliques du temple Vénérien. Et sentrepressoient de telle sorte que lun donnoit empesche à l'autre.

Belacueil souzdiacre faisoit resoner ses grans bassins dargent, dedens lesquelz qui ne pouuoit aduenir, il y ruoit, or, argent, drogues aromatiques, et odoriférantes, riches bagues, aornemens somptueux, et toutes espèces de richesse mondaine. Les autres par grand deuotion attachoient leurs cierges et leurs chandelles aux treilliz du grand autel et aux candélabres, tellement que les clercs et ministres dudit Belacueil ne suffisoient à recueillir et esteindre les chandelles, ny à espuiser les grans vaisseaux dargent. len veis aussi aucuns qui y mettoient des tableaux peints de leurs naufrages et mesaduentures, pour rendre grâce à la Déesse de ses miracles impetrez tant par mer que par terre.

Le diacre nommé Danger, qui dautrepart tenoit pied ferme, ayant vne grande et longue verge en la main, de dur mesplier, poli et plein de nœuz, dun visage rébarbatif

(1) Entretien, harangue. Cf. le vieux flamand Collacie.