CHAPITRE XXXIII

De la requeste couuerte et modérée que le luge rural Paris Alexandre feit de voir lesdites trois Déesses nues. Et de la denudation des corpulences dicelles. Explication de leurs beautez souueraines : Et de la sentence prononcée en la faueur de Venus, contre luno et Pallas. Du parlement desdites deux Déesses mal contentes, qui point ne retournèrent à lassemblee des Dieux.

Qvand le noble adolescent Paris Alexandre eut regardé aucune espace de temps la pomme dor enrichie de sa tige et des fueillettes de mesmes, et leu lescriture qui estoit à lenuiron, il dressa sa parole au Dieu Mercure disant ainsi : Tressaint et treseloquent Dieu, qui seroit auiourdhuy la créature viuant sur terre tant douée de parfonde doctrine ou de perspicacité dentendement, qui ne refusast vne charge si pesante et si dangereuse que ceste cy, veu que les Dieux mesmes ne lont voulu desmesler ? Voyans que sans acquérir la maie grâce des Dieux, ne se peult adiuger la chose contentieuse à la tierce. Donques si ie suis si téméraire que de la cuider mettre à fin, ce nest pas merueille si la doute que iay de mesprendre me fait tressuer dangoisse, et de grieue destresse. En mesbahissant comme le plaisir de mes treshautes et tresredoutees Déesses, sest condescendu à vouloir accepter le iugement de si basse personne comme moy, qui ne suis quun simple bergeret, le moindre des hommes mortelz, encores tout obombré de iuuenile ignorance , peu vsité en telz affaires , et qui à peine s* ose

aduenturer de sentremettre des menuz débats de ses compaignons pareilz et égaux. Si ne scay coniecturer autre chose, sinon que par confidence dun trop ample rapport, qui fait leur ha esté de ma petitesse, elles se sont accordées à mettre en hazart la coraparation de leurs diuines formes et speciositez. Voyant donques ny pouuoir alléguer resistence, ains faut que ie fleschisse souz le ioug du leur et du tien tressacré et trescremu commandement, ie délibère de men acquiter en brief, sans acception de personnes, et sans que les choses promises me meuuent en rien. Si te supplie en humblesse my vouloir prester confort et ayde, pour mener à chef ce présent affaire à mon honneur et preu. Car en tant quil me touche, ie ne voy moyen aucun dy pouuoir sauuer ma beniuolence enuers chacune partie : ne aussi dy sauoir rien discerner, au moins à la pure vérité, tandis que leurs benoites corpulences seront couuertes et voilées de ces précieux aornemens.

Adonc Mercure va dire : Certainement, mes treshonnonorees dames, sa raison est droiturierement bonne, et bien fondée : Car si la pierre précieuse estant exposée en estimation de sa propre bonté et value, nest veûe à descouuert, sans vmbrage et sans fueille, il nest au monde si bon lapidaire ne si sage congnoisseur, qui sceust au vray iuger de sa nobilité. Voz précieux habillemens pourroient deceuoir son œil. Car ilz occupent (1) la perfection de vostre belle facture, et mussent (2) lintegrité de voz perfections. Si vostre différent gisoit sans plus en lestimation de la resplendeur des bagues et loyaux dont vous vous parez, ou en la louenge des façons de voz riches habits, et achesmes, armes, loyaux

(1) emprisonneut.

(2) cachent.

2o2 ILLVSTRATIONS DE GAVLE, ET

et autres accoustremens, ie diroye que* ne prinssiez pas la peine de mettre ius voz nobles vestemens : Mais non, ains tend à plus haute chose : Cestasauoir, en lequiparation de la formosité de voz propres diuines corpulences, et en discerner prudentement le choix et lequipolence de voz membres illustres.

Les autres non respondantes{l) mot, comme surprinsesde honte et vouloir de non faire. Venus la plus hardie va dire en ceste manière. : Quelle timidité vous est suruenue maintenant, ô mes dames et Déesses ? icy ne voy ie point occasion de refuz : Car puis que si auant les choses sont allées, il nest point temps de reculer : ainçois vous voy monstrer le chemin moy mesmes pour la première. En ce disant, elle commença à desceindre sa noble ceinture, nommée Ceston, que dame Nature luy forgea iadis, pour la restraindre de sa trop grand licence et voluntaireté : et la bailla à garder à ses nobles Grâces et damoiselles. Adonc luno ce voyant, dit ainsi ; Certes dame Venus, de fuyr nauions nous nulle enuie pour crainte de reboutement : mais ie imagine quil est malséant à Déesses immortelles et chastes, mesmement(2) à Pallas la pucelle, et à moy qui suis femme de Roy et d'Empereur, de se monstrer nues à aucun homme mortel, combien que peu destime tu en fasses : comme toute cousmiere de diuerses compaignies viriles. Mais toutesuoyes puis que cest vn faire le faut, nous ne serons point des dernières. Alors toutes dun accord elles se retirèrent souz diuers vmbrages, en lieu de garderobes, et se feirent deshabiller vne chacune à part par leurs Nymphes et damoiselles. Si meirent ius leurs riches habillemens, tissuz de main ou*

(1) respondans (éd. 1512).

(2) surtout (du latin mawime).

SINGVLARITEZ DE TKOYE. LIVRE l. 255

uriere, et Pallas ses nobles armes. Et quand elles eurent deffublé coiffes, guimpes, atours, couronne, chapeau, salade, et autres accoustremens de teste : mis lus fermaillets, chaînes, aneaux, bulettes, carquans, ceintures et tissuz : et desuestu robes, cottes, manteau, cuirasse, et tous habits, flairans de diuerses odeurs exquises, semblables à baume naturel, meslé auec toutes les fleurs de violettes quon sauroit excogiter, iusques aux galoches dorées et diaprées douurage supernaturel, lesquelles elles retindrent en leurs piedz, de peur que Iherbette poingnante noffensast leurs plantes tendres et doucettes. Lors elles se présentèrent toutes trois sur le beau bout, telles que laube du iour blanche et clere, coulouree de splendeur vermeille se monstre à lœil du pèlerin qui beaucoup Iha désirée.

A ce diuin spectable, (1) le cler Soleil faisant son cours naturel parmy son cercle, sarresta tout court, pour auoir plus longue fruition de leur regard. Le noble fleuue Xanthus leua hors de ses vndes son beau chef verdissant de ioncz et de roseaux. Les Nymphes des fontaines reuestues de mousse et cresson, ietterent leurs tresses mouillées hors du parfond de leurs sourses. Les Dryades gentiles, parmy les creuasses des escorces de leurs arbres florissans meirent hors leurs belles faces. Les cheures et brebisettes du berger Paris en laissèrent le pasturer : et ses chiens se tindrent tous coyz sans bouger : et les toreaux en leuerent leurs testes. Les oiseaux de dessus les branches alongerent leurs colz pour mieux choisir. Les dains et les chamois reposans en lombre des pins de la montaigne, dressèrent leurs cornes. Les Demy dieux agrestes, sans se oser approcher espioient du haut des rochers. Les Vents retirèrent leurs

0) spectacle (éd. \5\2 et 1^28).

^^ ILLVSIRATIONS DE GAVLE, ET

halaines, et nosoient à peine souspirer de peur de les greuer. Les fueillettes espesses et drues qui faisoient vmbrage aux Déesses ne se remouuoient tant soit peu, à fin de ne faire bruit. Les ruisselets argentins decourans au long des herbages contindrent leurs douces noises. Et brief, toute chose terrestre feit silence, et se tint en grand paix et admiration pendant lostentation des corps diuins, lesquelz auoientdesia tout embaumé lair circonuoisin de leur flairante redolence diuine et arabrosienne. Adonc le pasteur Alexandre, rauj en ecstase, esblouy de si irradiante lumière, offusqué de la clarté procédante des corps célestes, pouriettoit ses beaux yeux assez foibles du long et du large de leurs venustes corpulences, et remiroit tout ce qui faisoit à noter en leurs formes, par grand sagacité.

La Rojne luno, pleine de granité matronale, et honnesteté pudique, dentre tous ses accoustremens ne reserua rien : fors quelle eust prins vn fin cœuurechef de crespe, long et large et bien délié, tout ourlé de franges de fîl dor et de soye, dont lune de ses Nymphes estoit toquée. Et leust mis sur son espaule senestre pendant en escharpe, et noué sur le costé dextre. Dont pource que les bouts voletans en lair, par leur légèreté, sesleuoient aucunesfois contre son gré, au mouuement de sa marche, elle tenoit lune des mains sur son pis, et lautre plus bas. Dautre costé Pallas la prudente pucelle, pleine de verecunde virginale, ne voulut point mettre ius sa riche chemise, tissue, fronsee et ouuree de sa tresindustrieuse main, et brodée dor traict, et de semences de perles selon les lisières. La raison pourquoy elle ne la despouilla, fut pource quelle estoit dune soye bysine, blanche comme lis, si clere et si subtile quon pouuoit bien choisir parmy sa transparence, toute lintegrité de sa belle facture.

Mais Venus la tresmondaine Déesse, non tant pour se nions trer honteuse et modeste, comme pour donner par quelque gracieux artifice augmentation à sa speciosité naturelle, auoit fait tistre en vn moment par ses trois Grâces, et sa nièce Volupté, vn grand floquart de roses blanches et vermeilles, bien garny de ioncz palustres par dedens, à fin que les branchettes espineuses ne violassent sa chair tendrette : Et le sestoit fait mettre et adapter en sorte quil enuironnoit ses larges reins, et reposoit sur ses grosses hanches, donnant gracieuse obomb ration à son noble sexe. Et certes ce simple aornement faisoit obtenir à la Déesse vne grâce singulière, et vne faueur especiale. Car les roses Vénériennes, assorties de ioyeuse mesure, auoientesté cueillies et triées sur le riuage du fleuue Scamander, par les propres mains de son filz Cupido Dieu damours. Si aduint que au moyen de sa contenance libérale, de sa présentation moins difficile, de sa propre gayeté et chère plus ouuerte, elle contraingnit ladolescent Paris, ieune dans et de sens, à seiourner son regard sur elle, plus que sur les autres.

Venus donques sestoit plantée sur le pied droit : et auançoit le gauche. La main dextre pliee sur la hanche, et lautre estendue au long de la cuisse senestre. Or nota Paris tout à loisir, la resplendeur de ses tresses dorées longues et espesses, dont les floquons espars sans ordre ça et là, donnoient merueilleuse décoration au chef, et aux espaules eburnines. Considéra lamplitude et spaciosité de son cler front bien arrondy : larcure de ses sourciz noirs : la splendeur admirable, et lattrait amoureux et penetratif de ses yeux vers (1) : la forme de son nez traitiz (2) : la fresche cou- Ci) i>airs (éd. 1512).

(2) joli.

iBS ILLVSTRATIONS DE GAVLE, ET

leur et le beau teint de sa face : la rondeur de ses loues purpurines : la petitesse de la bouche riant, auec leleuation de ses leures coralines et bien iointisses que délies raesmes sembloient semondre vn baiser. Et aussi la grâce de son fosselu menton, et la blancheur délicieuse de son gosier crystallin. Puis après le ieune berger par grand attention se print à remirer la gente trossure des deux mamelles de la Déesse, et le grand interualle qui estoit entre elles : la faitisse gracilité du fauts (1) de son corps, la solidité de ses bras massifz, et la speciosité de ses mains délicates : la polissure vnie de son ventre marbrin : la grosse tournure de ses blanches cuisses : la pleine charnure de ses molz genoux : la vuidure élégante de ses belles iambes : la façon mignote de ses petis piedz : Et la perfection totalle du demeurant de sa noble facture et corpulence, que tant luy pleut, que mieux vaulsist que iamais ne leust veiie. Car il neut pas le sens de la réduire en comparation à lextreme formosité, et souueraine excellence spirituelle des deux autres Déesses : ainçois sarresta du tout à contempler la beauté corporelle de Venus. Alors luno et Pallas commencèrent à auoir peur de leur cause perdue, et craindre la stolidité de leur luge indiscret : Là ou Venus au contraire, monstroit semblant tresasseuré, par ses gestes pleins de lasciuité féminine. Toutesuoyes elles se souffrirent (2) vn peu : attendans douteusement lopinion du berger : duquel les yeux estincelans, et les prunelles errantes et vagabondes, alentour de limage Venerique, denotoient assez son appétit sensuel estre cateillé (3) dun désir non chaste, et tout enflambé de luxure

{\) faulâ! (éd. 1512 et 15^8).

(2) se continrent.

(3) catillare^ harceler, chatouillei', flam. kitteUn.

excessiue. Si prononça finablement larrest et la sentence de son iugement. Et dune voix tremulente et casse, et pleine de crainte, ayant le visage honteux, dit en ceste manière :

Treshautes et trespuissantes Déesses, puis que ainsi est, quil ha pieu à voz maiestez souueraines de souzmettre le choix de voz formes nompareilles à la loy de mon simple iugement, ien diray ores (selon la rudesse et petitesse de mon engin) ce que ien treuue, par la nudité de voz beautez descouuertes : Cest que après meure délibération bien debatue et consultée, entre mes yeux et ma pensée, lesquelz nont sinon droit, raison et vérité deuant leur imagination : sans faueur, fraude, ou corruption quelconques : le dis et prononce par sentence diffinitiue, que combien que toutes soyez remplies de formosité souueraine, et resplendeur esmerueillable, comme tresinclytes Princesses deïfiques que vous estes, neantmoins ainsi quil me semble (souz la bénigne grâce et supportation de voz hautesses), madame Venus surpasse en lineature et droitesse de corsage, vous autres deux, mes tresredoutees Dames et Déesses. Parquoy la pomme dor, selon linscription qui est en elle entaillée, luy doit estre deliuree paisiblement. Si vous supplie prendre en gré, ce que ma rude sensualité en ha sceu ditter. Et au surplus me pardonner, si à toutes nay peu complaire.

Des que Paris eut fine la prononciation de sa sentence, Mercure deliura promptement la pomme litigieuse es mains de la Déesse Venus sa sœur, laquelle la receut à grand ioye et exultation. Mais luno et Pallas qui se furent desia fait reuestir en grand haste, ne pouuoient couvrir ou dissimuler le semblant de leur douleur. Car il nest point de plus grief desdain à vne noble femme, que de se voir vaincue et surmontée en question de beauté corporelle. Toutesfois la pucelle Pallas, supportoit assez modestement la passion de

ILLVSTRATIONS DE GAVLE, ET

son cœur, et digeroit taciturnement apart elle sa grieue indignation. Mais luno Saturnienne (embrasée de grand ire et impatience) ne se peut onques abstenir de desgorger la fumée de son despit : ainçois dun visage palissant, et duns yeux allumez par grand fureur, dune voix aigre, sonoreuse et abrupte, et dune oraison Satyrique et pleine de mordacité, increpa son luge Paris, en ces te manière :

0 homme brutal, beste transformée, créature destinée à toute infelicité, Idole fantastique qui semblés ce que tu nés pas, vaisseau corrompu de lubricité vilaine, et sac à fiens et pourriture, mal est employée beauté corporelUe en si lasche courage : mal sont assignez les biens de Dieu et de Nature en chose si desnaturee : Nas tu eu honte de préférer la vie voluptueuse et inutile, à la vie actiue et contemplatiue ? Nas tu eu vergongne de postposer (1) la pardurable à la transitoire ? de laisser le grain pour la paille, la seue pour lescorce, le fruit pour les fueilles, et le gain pour la perte ? De mespriser la vraye viuacité des images célestes, pour le fard coulouré et teint sophistique, dune statue plate et vuide ? Et finablement de changer les trésors du souuerain fastige, et l'amas de douceur scientifique, aux fanges de toute basse souillure, et au mespris de toute infameté ? luge ridicule et syluestre, plus léger que nest la plume au vent, prodigue de ton honneur, courage de meretrice, poilu dun léger promettre, tout vermolu dinconstance, mal sainement délibérant, aueugle choisisseur, as tu osé vomir de ton puant estomach, sentence si orde, si inique et si sanguinolente, qui te coustera la vie, et de cent mille meilleurs que toy ? En cuides tu demourer impuny ? Crains tu point ma puissance immensible, quand elle est addonnee à

(1) Le contraire de 'préférer.

vindication ? Ignores tu comment ie punis iadis ta folle tante Antigona fille de Laomedon, et sœur de ton père Priam ? Scais tu point que le malheureux visage, dont elle se glorifioit, en osant sa beauté outrecuidee comparer à la mienne, luy fut par moy transformé en vn bec de cicongne, duquel iusques à maintenant elle pesche et peschera tousiours les crapaux, et les raynes, parmy les marescages, pour son viure et sustentation ?

le congnois ores que ceux de ta maison ne sont nez, fors pour me faire iniure. Il me souuient du rauissement de Gany modes, ton proayeul, qui fut fait et perpétré au desauantage de moy et de ma fille Hebé. Et nay pas oublié la rudesse que ton ayeul Laomedon feit à mon frère Neptune, en édifiant les murs de la cité de Troye. Mais ores est venu le iour, que iay trouué occasion de rétribuer payement selon le mérite : et de maddonner du tout à hayne et vengeance immortelle. De laquelle ie ne seray assouuie, iusques à ce que la malheureuse maison ou tu a prins origine soit exterminée par ton moyen : et le païs circonuoisin depopulé, et la nation esparse parmy le monde, ainsi que la paille dorge que les laboureurs ventillent au vent. Ainsi que luno disoit ces paroles, et fremissoit encores entre ses dents, elle monta sur son chariot, redoublant mille menasses. Pallas aussi non contente de sa vilipendence, ne dit autre chose de cler en ses murmurations, fors quelle le laissoit abesty en sa propre ignorance, de laquelle il nauroit iamais congnoissance, iusques au temps de son final destruisement, et mort irrémédiable (car quand la puissance diuine veult demonstrer grand signe de courroux et vengeance sur rhomme,cest de luy tollir son propre sens). Ainsi partirent les deux Déesses, conceuans vne hayne non appaisable encontre les Troyens. Mais elles prindrent diuers

260 ILLVSTRATIONS DE GAVLE, ET

chemins, sans retourner à lassemblee des Dieux : pource quelles estoient esprises de honte et de courroux. Pallas sen alla à Athènes, et luno en lisle de Samos.

Paris, tout troublé de la dure inuectiue de Tuno, et des menasses de toutes deux, se preparoit à plusieurs excuses : mais leur soudain département, ne luy donna lieu de parler. Lors Venus qui sestoit reuestue tout à loisir le consola doucement, disant quil ne sen falloit que rire, et quil ne sen souciast ny esbahist : car leur manière est ainsi hautaine et superbe, et leur parler plein de menasses et vantises. Mais contre tous et toutes, elle et son amy le Dieu Mars luy seront bons garands : en luy faisant ratification iteratiue de la promesse précédente, et le remerciant de son b on iugement. Puis elle monta sur son chariot richement housse (1) et enharnesché, et print sa nièce Volupté auec elle. Lenfant Cupido tourna la bride des oiseaux vers le mont Pelion, tenant la pomme dor en sa main. Et les trois Grâces suiuirent leur maistresse, auecques les deux chambrières Accoustumance et Tristesse. Mercure aussi alloit douant par grand vélocité. Paris qui demoura tout seul se rasseura de léger, et se donna confiance de laduenir : pensant desia à son restablissement en la maison paternelle, et au mariage et grand beauté de la Roy ne Heleine, à luy promise par la Déesse Venus. Vers laquelle il commençoit desia daspirer de toute sa puissance et sesleuoit en courage de hautes choses perpétrer. Pape Pie (2) en la description d'Asie, met que la montaigne ou fut fait ledit iugement des trois Déesses par Paris Alexandre, fut tousiours depuis appellee Alexandria.

(1) arrangé.

(2) Pie II (Aeneaa-Silvius Piccoloraini).

SmGVLÂRlTEZ DE TROYE. LIVRE 1. . 261