CHAPITRE XXXIX
Comment plusieurs nobles Princes et cheualiers de la maison du Roy Priam faisoient leurs preparatiues, pour deffendre le pas, au combat et tournoy : et comment Paris Alexandre accompaigné de sa femme et des pasteurs Royaux départit de la contrée Cebrinoiae pour aller à Troye.
Commençant à faire ses approches, le premier iour du gentil moys de May, que les nobles champions deuoient entrer au camp, pour deffendre leur pas. Le trespreux Hector, Prince et chef de toute lemprise, estoit bien embesongné à faire ses appretz de cheuaux, harnois, bardes, boussures, et autres choses qui luy faisoient mestier, et aussi estoient tous ses frères, tant bastards que légitimes, et autres gentilzhommes de Troye, estans du nombre des entrepreneurs. Et pareillement les Princes et cheualiers de Thrace, et ceux de la basse Phrygie et maison de Priam, du nombre des assaillans faisoient semblable deuoir dapprester toutes choses nécessaires à la iouste.
Tous ces nobles Princes, damoiseaux et enfans dessusnommez, et autres (dont la grand antiquité ha oblitteré les noms) par désir de louenge acquérir au noble pas et tournoy, tant ceux qui estoient amoureux pour complaire chacun à sa dame, comme les autres pour se monstrer par deuant les Princes estrangers, meirent toute leur entente, puissance et diligence destre pompeux et gaillards, en li-
9BB ILLVSTRATIONS DE GAVLE, £T
urées estranges et deuises nouuelles,et à estre saisis de bonnes montures, si donnèrent ordre que les trefz, tentes et pauillons fussent dressez, et les voiles tendues. Et aussi que les hourds et eschafFauts fussent faits somptueusement, peints et dorez richement : fondez, bastis,et appuyez aussi pardurablement, comme si ce eust esté œuure pour demourer à iamais. Les anciens appelloient lesdits eschafFauts, théâtres et amphithéâtres. Et furent toutes ces choses faites par bons ouuriers, en la prairie, qui est entre les deux fleuues Simois et Scamander, hors des murs de la cité de Troye.
Et quand la veille du premier iour tresdesiré du ioly moys de May fut venue, Paris Alexandre et la Nymphe Pegasis Oenone, se louèrent deuant laube du iour, si foirent le bon pasteur et sa femme : car beaucoup leur auoit tardé la venue de ce iour ; Paris print son arc, ses flèches, et ses dards, quil auoit despieça mis apoint par grand curiosité. Et la Nymphe saccoustra de ses plus riches habillemens, et cueillit son plein giron de belles fleurs de leur iardin, lesquelles elle apporta auec elle. La bonne femme et son mary nourrisseurs de Paris, prindrent le berseau, les linges et les menuz accoustremens dont il auoit esté enuelopé à sa naissance : et menèrent auec eux seulement deux de leurs enfans, cestasauoir vn filz, et vne belle fille. Ladite fille pour accompaigner la Nymphe Oenone, et le filz pour eux seruir, en laissant les autres pour la garde des troupeaux et du mesnage. Et de tout ne sonnèrent mot à aucun de leurs voisins (et neantmoins aucuns des compaignons de Paris le sceurent, si vindrent auec luy) ainçois se meirent tout coyement en chemin vers la cité de Troye, qui nestoit que à quatre ou cinq petites lieues de là. Pourquoy ilz arriuerent de bon matin au lieu ou les pauillons
SINGVLARITEZ DE TROYË. LIVRE I. 299
estoient tenduz. Et se meirent en lombre dun figuier, souz lequel ilz feirent vne petite loge ou fueillee de verdure. Si se repeurent illec de telz viures quilz auoient apporté auec eux : et burent de leaue du noble fleuue Scamander. Et après ce, la Nymphe Pegasis Oenone se print à tistre vn chapeau de flourettes quelle auoit apporté, etdautres quelle cueillit parmy la prairie. Et quand il fut acheué, elle lassist sur le chef de son seigneur et amy Paris, lequel pour ^ rétribution de guerdon luy en rendit vn doux franc baiser. } Si couchèrent illec attendans le lendemain.
300 ILLVSTKATIONS DE GAVLE, ET
