CHAPITRE XLII
De la présentation que le berger Paris Alexandre feit de soy mesmes, aux ieux et combats, en son habit pastoral. Et comment le Prince Hector le récent à la luitte, non sachant quil fust son frère. Auec narration de la victoire obtenue par ledit Paris, contre le Prince Hector.
Qvand le ieune berger Paris Alexandre veit ladite luitte de son frère et dudit Prince acheuee, il saillit légèrement oultre la barrière : et se iotta dedens les lisses, sans demander congé à ceux qui gardoient lentree, dont chacun sesmerueilla, et fut de tous regardé à ceste cause. Sa robe, à la mode pastorale dadonques, estoit sans plus dun rochet de cotonine blanche, ourlé et fronsé deuant et derrière, sans manches. Mais aux lisières il y auoit des figures de brodure de laine, de diuerses couleurs , ouurees de la main de la Nymphe. Cest accoustrement assez longuet et large, estoit cueilly et retroussé au fauts du corps, et ne luy venoit que iusques à my iambe : sa ceinture estoit dosiere menue entrelassee à nœuz damours bien gentement. Et sur sa teste nauoit autre chose fors le chapelet de fleurs et de rosettes, que sa dame la Nymphe Oenone y auoit posé. De lespaule dextre luy pendoit en escharpe son carquois fait de cuir de biure (1) à tout le poil, et dedens estoient ses flesches. En sa main dextre il portoit son arc bendé, et en lautre tenoit deux dars de fresne ferrez et empenez : au demourant il estoit tout nud.
(1) bievre (éd. 1512).
Grand fut le murmure alors entre le peuple, les seigneurs et les dames, de la nouueauté du cas. Oenone la noble Nymphe, et ses bonnes gens eurent grand ioye quand ilz veirent que le preux Hector receuoit Paris à la luitte. Les dames commencèrent à extoller entre elles la merueilleuse beauté dont le berger estoit garny : et disoient que onques mais nauoient veu si bel adolescent. Les vnes le comparoient à vn Dieu Apollo, pour sa perruque espesse et bien dorée. Les autres affermoient que son chapelet de diuerses fleurettes, ressembloit vne couronne de pierres précieuses, mises en œuure sur vne lame de fin or, et sur vn image dyuoire, Et ne pouuoient croire que ce fust vn berger, ains soustenoient que cestoit quelque noble homme, qui sestoit ainsi dissimulé par manière de passetemps. Car combien quil sentist sa façon pastorale, neantmoins portoit il au visage vne manière de générosité Royale, qui tiroit les gens en admiration, et en sa faueur. Sa contenance ne tenoit rien de rusticité champestre, ains auoit vn estre naturellement attrayant, et vn port libéral et hautain.
Plusieurs des ieunes Princes ausquelz les gestes de Paris complaisoient, sestoient desia assemblez entour de luy au pauillon du Prince Eurypylus de Mysie, et eux mesmes laydoient voluntairement à habiller. Si luy furent baillez vns riches draps à chausser, et une coiffe de mesmes pour trousser les beaux cheueux. Et fut tout son corps oint dhuile doliue vierge. Apres quil fut gentement accoustré, il saillit du pauillon : et se monstroit aux assistans beau comme le beau iour, blanc comme vn cygne (excepté ce qui auoit esté descouuert au hasle du Soleil) de stature haute et droite, de membres bien quarrez, et corpulence ferme, et bien formée : Les yeux rians, les cheveux blonds et molz, et la bouche venuste et gracieuse. Et nauoit fors vn petit de
348 ILLVSTRATIONS DE GAVLE, ET
barbe dorée, qui luy commençoit à naistre au menton. Si feit la reuerence aux dames, comme il auoit veu faire aux autres. Lors Ideus le Roy darmes (qui ne sauoit autrement son nom, sinon quil lauoit ouy renommer pour gentilhomme) se print à escrier en ceste manière : « Or est venu lescuyer incongnu, portant dargentà vn chef dor, par artifice de nature, qui veult faire armes, pour honneur acquérir. ))
A ce cry le Prince Hector sortit deuant sa tente, et veit ce ieune enfant ainsi habillé en berger. Si ne le mesprisa en rien (car cestoit le plus courtois cheualier du monde) ains dit aux dames en riant : « Mes dames, ie me recommande à voz bonnes prières. Si ce nouueau champion emporte le prys, vous vous pourrez bien moquer de moy, et dire que ie lauray mal defFendu. Neantmoins vous y aurez moins de regret, pour autant quil est beau fîlz. » Ainsi disoit Hector, le plus courtois cheualier, qui onques fut né de mère. Alors les dames et damoiselles se prindrent à souzrire. Et madame Creusa sa sœur, femme d'Eneas, luy dit ioyeusement ainsi : « Mon seigneur mon frère, ie croy que vous len garderez bien au plaisir des Dieux : mais ie vous prie, traitez le doucement : Car le ieune pastourel nest pas pour endurer grans trauaux. » — « Selon ce quil me fera, ie luy feray » dit Hector. Alors il leua la main : et les trompettes et clairons commencèrent à sonner par grand mélodie.
Les deux tresnobles champions, tous reluysans de beauté et de leurs accoustremens, et de Ihuile doliue dont ilz furent oincts, commencèrent à marcher lun vers lautre, à grans pas, comme font deux taureaux indomptez estans aux deux cantons dun pré, lesquelz se viennent entrehur-
ter par grand felonnie. (1) Adonc la belle Nymphe Pegasis Oenone, et ses bonnes gens, prioyent les Dieux par grand solicitude, à fin quilz fussent propices à lenfant (2) Paris. Et faisoient vœuz et multiplications de dénotes promesses, tendans à ces fins. Si faisoit la Royne Hecuba tacitement en son cœur. Car elle auoit grand désir, que son cher filz Paris se portast vertueusement (3) en cest affaire.
A laborder , ilz sentrelasserent magistrallement , de mains, de bras et de iambes, comme fait vn bon charpentier, qui assiet ses mortaises ensemble, par grand artifice. Paris estoit soupple et léger du pied, autant quil est possible : et Hector fort et ferme, et de merueilleuse puissance et resistence. Si labouroit Paris autour de luy, comme font ceux qui assiègent vne grosse tour, et affustent leurs engins de tous costez pour labatre, puis baillent lassant maintenant dune part, maintenant dautre, selon ce quilz cuident y gaigner auantage. La Nymphe Oenone et ses bonnes gens, bien empeschez à les regarder de dessus le tertre ou ilz estoient, faisoient diuers gestes et mouuemens selon leurs affections. Car ilz contournoient leurs corps aucunesfois dun costé , aucunesfois dautre, ainsi quilz voioyent encliner Paris. Et bien le cuidoient redresser, et luy faire ayde par ceste manière de faire. Tous les deux champions tressuoient de peine, sans aucun exploit final. Parquoy après longue espace de temps ilz se reculèrent vn peu pour reprendre leurs haleines.
Moult fut estimé le berger Paris de grand vertu , par tous les assistans, quand il auoit peu endurer iusques là la
(1) c.-à-d. fureur.
(2) c.-à-d. jeune prince.
(3) c.-à-d. courageusement.
ILLVSTRÂTIONS DE GAVLE, ET
violence du Prince Hector, et demeurer debout si longuement, là où onques homme mortel nen auoit tant attendu. Si louoient fort le ieune pastoureau : et monstroient lun à lautre, comment il estoit façonné despaules et de haute poitrine, et comment sa contenance luy seoit bien. Le preux cheualier Hector commençoit à auoir honte et despit, de ce que son aduerse partie duroit tant sans estre vaincu. Si se remirent tantost en besongne : pour la seconde venue , rencontrèrent pied contre pied, espaule contre espaule, et teste contre teste : en mettant en auant tous les tours de croc et de hanche, et industrie de luitter, dequoj ilz se sceurent aduiser. Et sentretastoient si lourdement en redoublant leurs prinses, que la chair de leurs bras, de leurs colz et de leurs espaules, rougissoit à tous costez. Toutesuoyes lun ne pouuoit mouuoir lautre de sa place, ny esbranler de son pas. Adonc Hector ce voyant, par grand ire meslee dimpetuosité, sesuertua desmesurémeiît, en baillant si grand attainte du plat du pied contre la iambe de Paris, que à peu quil ne la luy froissa : et le fait chanceler sur vn genouil, tant quil fut prochain de tomber. Mais Paris par sa force et légèreté, euada la cheute. Puis se rasseura ferme sur piedz, et de chaude choie, (1) pressa coup sur coup son frère Hector, en le hastant par toute manière dimportunité. Puis soudainement le tira à luy en reculant : et le laissa eschapper par si grand rudesse , quil luy feit baiser la terre bien violentement, et choir à dens de sa hauteur tout plat estendu : tellement que au tomber il sembla donner tel coup, comme fait vn grand chesne en la forest, qui par le soufflement impétueux des vents, ou dun grand orage est abatu .
(1) colle (éd. 1512), c.-à-a. vivement.
