PROLOGUE

Dont il appert, que qui veult tirer ceste matière à sens moral, on la peult appliquer à linstruction et doctrine dunchacun ieune Prince de maison Royalle, comme estoit Paris Alexandre. Or ne scay ie nulle Princesse viuant auiourdhuy sur terre (sauue la bonne paix des autres) qui puist en ce premier liure plus conuenablement tenir le lieu de dame Pallas, que ta personne, Princesse illustre : Ne aussi ne scay ie, qui mieux puist figurer le personnage du tresbel enfant Royal, Paris Alexandre, que le tien trescher neueu Larchiduc Charles d'Austriche et de Bourgongne, Prince des Espaignes, etc. Parquoy nous en prendrons icy la similitude de mesmes : et présupposerons que la lecture de ce présent premier liure luy représentera le cours de son aage puéril, depuis ores quil est sur le dixième an, iusques à ce quil soit parcreu en adolescence. Lequel temps pendant en ses iuueniles exercices il peult (louablement et sans reprehension) ensuiure les actes de Paris Alexandre, filz du Roy Priam de Troye, tant à la chasse comme en armes, et en amours : cestasavoir, en donnant franchement son cœur à vne seule chaste Nymphe, ou demydeesse, par loy de mariage (et non autrement) auec laquelle il hantera (par gayeté amoureuse) les bois et les foretz, en habit de pasteur, et de veneur. Pareillement en cest affaire (ie qui suis Mercure) vn cler entendement angelique, de noble et diuine nature, que les Philosophes appellent bonvs genivs, qui comme messager des Dieux quand ledit enfant ieune Prince commencera à vuider de puérilité, et sera encores en estât de pastoureau : cestadire, de douce simplesse sans rusticité ne malice, alors ie luy presenteray la pomme dor, cestadire, son propre franc arbitre : Et le feray luge de la beauté des trois Déesses : cestasauoir Prudence, Plaisance, et Puissance. Lequel (comme sage) choisira la meilleure et