CONTRAT DU 3 DÉCEMBRE

Je, Michiel Coulombe, habitant de Tours et tailleur dymaiges du roy nostre sire, tant en mon propre et privé nom comme es noms de Guillaume Regnault, tailleur d'ymaiges, Bastyen François, maistre masson de l'église de sainct Martin de Tours, et François Coulombe, enlumineur, tous trois mes nepveus, confesse, promectz, affirme, et certifie, en foy de loyal preudhomme, les choses qui s'ensuyvent estre véritables, tant pour le présent et passé que pour l'advenir, et ce pour la descharge et acquit de Jan Lemaire, indiciaire et solliciteur des ediffices de très haulte et très exellente princesse, Madame Marguerite, archiduchesse d'Austriche et de Bourgoigne, duchesse douairière de Savoye et comtesse palatine de Bourgoigne.

C'est assavoir tout premièrement je confesse es noms que dessus, avoir eu et receu de madicte dame, par les mains de son dict indiciaire, Jan Lemaire, la somme de quatre vingtz quatorze florins dor dAllemaigne àr vingtz sept solz six deniers tournois pièce, qui reviennent à la somme de six vingtz huyt livres treize solz tournois, monnoie de roy, présentement courant. Et ce pour noz peines, labeurs et

(1) Cité in extenso par Bordier et Charton, Histoire de France II, 124.

salaire de faire la sépulture en petit volume de feu de bonne mémoire, Monseigneur le duo Philibert de Savoye, raary de ma dicte dame, selon le pourtraict et très belle ordonnance faicte de la main de maistre Jehan Perreal de Paris, painctre et varlet de chambre ordinaire du roy, nostre dict seigneur ; delaquelle somme de quatre vingtz quatorze florins d'or d'Allemaigne revenans à la dite somme de six vingtz huyt livres XIII sols, je me tiens pour content et bien payé et en quitte, es noms que dessus, les dis Jan Lemaire, solliciteur pour Madame, de tous autres à qui il appartiendra. Et de laquelle sépulture je, Michel Coulombe, dessus nommé, feray de ma propre manufacture, sans ce que autres y touche que moy, les patrons de terre cuitte, selon la grandeur et volume dont j'envoie à ma dite dame deux pourtraictz, l'un en platte forme pour le gisant, l'autre en élévation ; faiz les diz patrons de la main desdis François Coulombe, enlumineur, et Bastyen François, masson, mes nepveux. Et ledit Bastyen fera de pierre de taille toute la massonnerie servant à la dicte sépulture en petit volume par vrayz traictez et mesures, tellement que en réduisant le petit pie au grand, Madame pourra veoir toute la sépulture de mondit feu seigneur de Savoye, dedans le terme de Pasques, pourveu que aucun inconvénient ou fortune ne surviengne audit Coulombe durant ledit temps ; et iceulx patrons je promectz loyaument, à l'aide de Dieu, faire pour ung chief d'euvre, selon la possibilité de mon art et industrie.

Oultre plus pour ce que ledit solliciteur Jan Lemaire nous a affermé que Madame désire d'estre servye en ses édiffices de gens meurs, graves, savants, seurs, certains, expérimentez, bien condicionnez et observans leur promesse, comme bien raison le veult, mesmement de ceulx

que je dessus ay nommez, assurera) à madicte dame estre telz ; dicy et desja j'asseure et afferme que Guillaume Regnault, tailleur d'ymaiges, mon nepveu, est souffisant et bien expérimenté pour réduire en grand volume la taille des ymaiges servant à la dite sépulture, en ensuivant mes patrons ; car il m'a servy et aidé lespace de quarante ans ou environ, en tel affaire en toutes grand besoignes, petites et moyennes que, par la grâce de Dieu, j'ay eues en main jusques aujourd'huy et auray encoires et tant qu'il plaira à Dieu. Mesmement il m'a très bien servy et aidé en la derrenière euvre que j'ay achevée ; c'est assavoir la sépulture du duc François de Bretaigne, père de la royne ; de laquelle sépulture j 'envoyé ung portrait à Madame (1).

D'autre part, ledit Bastyen François, gendre de mon dit nepveu, s'afferme estre souffisant pour exploicter et dresser en grand volume les patrons de la dicte sépulture quant à l'art de massonnerie et architecture. Lesquelz patrons seront faitz en petit volume de sa main propre.

En après lesdiz patrons achevez, dedens le terme de pasques dessus diz, et iceulx estoffez de paincture blanche et noire, selon ce que la nature du marbre le requiert, par ledit François Coulombe, enlumineur, la taulette de bronce dorée et les lisières, armes fourrées d'ermine, carnation de visaiges et de mains, escripture et toutes autres choses à ce pertinentes fournies, selon que le devoir le requiert ; je dessoulz signé prometz envoier lesdis Guillaume Regnault, mon nepveu, et Bastyen François, son gendre, porter ladite sépulture en petit volume à Madame quelque

(1) Anne de Bretagne fit élever ce tombeau à son père François H, duc de Bretagne, dans la cathédrale de Nantes. C'est le chef-d'œuvre de Michel Coulombe (1507).

part qu'elle soit, dedans le terme de la purification de Nostre Dame.

Ensemble l'élévation de la platte forme de son église, mesmeraent touchant la sépulture des deux princesses, dont nous avons les portraitz et tableaux, faitz de la main de Jehan de Paris, et aussi ledit Bastyen Françoys portera la montée de l'élévation du portai et des arcz boutans par dehors ; pour lesquelles choses estre faictes par le dit Bastien François, j'ay retenu le double de la plate forme de la dite église du Couvent de Saint Nicolas de Tolentin lez Bourg en Bresse, icelle platte forme faite et très bien ordonnée sur le lieu, mesurés de la main de maistre Jehan de Paris, avec l'advis, en présence de maistre Henriet et maistre Jehan de Lorraine, tous deux très grand ouvriers en l'art de massonnerie.

Et quant lesdits Guillaume et Bastyen, mes nepveux, auront présenté ladite sépulture en petit volume à ma dicte dame et icelle dressée en sa présence et déclairé toutes les circonstances et dépendances d'icelle, s'il plait à Madame, j'entreprendray volontiers la charge et marche d'icelle faire réduire en grant volume par ledit Guillaume, tailleur dymaiges et Bastyen, masson. Lesquelz j'envoiray sur le lieu dudit couvent lez Bourg en Bresse avecques Jehan de Chartres, mon disciple et serviteur, lequel m'a servy l'espace de dixhuit ou vingt ans et maintenant est tailleur d'ymaiges de Madame de Bourbon, et aussi autres mes serviteurs dont je respondrai de leur science et preudhommie, et dont je ne penseray avoir honte ne dommaige.

Et ce pour autant que à cause de mon aige et pesanteur, je ne me puis transporter sur ledit lieu personnellement ; ce que autrement j'eusse fait voulentiers pour lhonneur, excellence et bonté de la dicte très noble princesse.

Et pour ce faire, si le cas advient, que Madame soit conseillée d'exécuter sa bonne intencion par le labeur de moy et des miens, dicy et desja j'advoue, ratiffie et tiens à bons, fermes et approuvez tous les marchez que lesdiz Guillaume, tailleur d'ymaiges et son gendre masson feront avec ma dicte dame en mon nom et au leur, touchant ladicte sépulture et autres choses concernans notre art d'ymaigerie et architecture, comme se moy-mesmes y estoie présent, et à leur partement leur en feray procuration expresse, se besoing fait, ce que je faiz desja.

Et affin que le voiaige du pays de Flandre encoires incongneu à mesdis nepveux, leur soit plus seur et plus certain, est moyenne que Jan Lemaire nous laisse ou envoie icy ung solliciteur et guide pour conduire jusques là mesdis nepveux ; c'est assavoir son nepveu Jehan de Maroilles ou son serviteur Jehan Poupart. Et avons convenu avec ledit Jehan Lemaire que chacun de mesdits nepveus aura par jour, compté depuis leur partement de ceste cité de Tours, dont je feray certification par mes lectres jusques à leur retour, la somme de cinq philippus dor, vallant vingt-ung solz tournoy, sauf ce quil plaira mieulx tauxer à Madame et recognoistre leurs labeurs et diligences, comme moy et les miens avons parfaicte confience en son Excellence très renommée, laquelle nous tous desirons servir de bon cueur, s'il lui vient à plaisir.

Au surplus, ledit Jan Lemaire nous a apporté une pièce de marbre d'albastre de Sainct-Lothain lez Poligny, en la conté de Bourgoigne, dont il a nouvellement descouverte la carrière ou perrière. Laquelle comme nous avons entendu par certaine renommée a autreffois esté en grant bruit et estimation, et en ont esté faictes aux Chartreux de Dijon iv. »

aucunes des sépultures de feuz messeigneurs les ducz de Bourgoigne, mesmement par raaistre Claux, (1) raaistre Anthoinet, souverains tailleurs d'ymaiges dont je, Michiel Coulombe, ay autreffois eu la congnoissance, et à la requeste dudit Jan Lemaire, ay taillé de ma propre main ung visaige de saincte Marguerite ; et mon nepveu Guillaume l'a poly et mis en euvre dont je faictz ung petit présent à ma dicte dame et luy prye qu'il luy plaise le recevoir en gré.

Certifiant et affermant que, pourveu que ladicte pierre soit tirée en bonne saison et les ancyens bancz descouvertz avec grand et ample descombre fait sur le bon endroit, c'est très bon et très certain marbre d'albastre, très liche et très bien polissable en toute perfection et ung trésor trouvé au pays de ma dicte dame, sans aller quérir autre marbre en Ytalie ny ailleurs ; car les autres ne se polissent point si bien et ne gardent point leur blancheur, ains se jaulnissent et ternissent à la longue.

Toutes lesquelles choses dessus dictes je confesse, promets, afferme et certifie estre vrayes et ainsi que dessus promises, asseurées et conventées entre ledit Jan Lemaire, solliciteur pour Madame, et moy ; tesmoing mon saing manuel cy mi* le troisième jour de décembre l'an mil cinq cens et unze.

Et pour notre seurté d'ung costé et d'autre, ay requis à saige et discret homme Macé Formon, notaire roïal et personne publicque cytoien de Tours, soubz scripre et soubz signer avec moy.

Pareillement ledit Jan Lemaire, notaire impérial et

(i) Cf. Biographie Nationale IV (art. Claux de Verne.) Claux Sluter, sculpteur des six magnifiques statues du puits de Moïse (Chartreux de Dijon), en partie l'auteur du tombeau de Philip- Hardi + 1404.

solliciteur pour ma dicte dame, a soubz script et soubz signé, en tesmoignaige de vérité et soubz les obligacions, soubzmissions nécessaires d'une part et d'autre, mesmement de la part dudit Lemaire, touchant la promesse et assurance du paiement du voiaige de mesdis nepveux, et en tant que en lui est, de adresser les marchez à lhonneur et prouffit de ma dicte dame et de moy son très humble et très obéissant serviteur. (Suivent les signatures) M. Coulombe, Formon, Lemaire, indiciaire, de Belges. (Original en parchemin, Ch. des Comptes de Lille).