DE LA PREMIERE INSTITUTION DES POMPES FUNERALLES SELON LA LOY PAYENNE

La vanité supersticieuse des payens ydolatres cuida jadis que Pluton, selon leurs fables, Dieu des régions infernalles, frère de Jupiter et de Neptune, filz de lancien Saturne fut le premier qui institua aux viuans de faire honneur aux mortz, et ordonna quon appaisast leurs umbres, daucuns sacrifices. Les egiptiens y assignoient quelque raison, et estoit leur opinion telle que les âmes après le partement du corps estoient errans et vagabondes autour du riuaige du Styx et la grand palu denfer (1) qui est interprétée tristesse, et ne pouoient estre passées oultre par Caron le viel nautonnier pour boire de leaue obliuieuse du fleuue Lethes et auoir repos final aux champs elisees, ains que le corps eust eu tous ses debuoirs de, funérailles. Si comme Virgille racompte de Miscenus eolides (2) qui fut noyé en la mer. Lesquelz obsecques estoient dédiez et consacrez à l'honneur diceluy pluton et des autres Dieux infernaulx quon appelloit mânes. Or selon diuerses manières de peuples estranges et barbares on usoit diuersement de la manière densepuelir, dont la pluspart sont horribles à racompter. Si me deporteray de la confusion dicelles, et ne prendray seullement que la mode dont usèrent les Troyens Grecz Roumains Egiptiens et Juifz es pompes funèbres de leurs princes qui est merueilleuse et diverse.

(i) Paisgrave dit que Lemaire aurait dû mettre l'article au mas* culin. (i) Le trompette Misenus. Cf. Enéid. III, 239. VI, 162.