LA ROYNE DE CARIE

Ains que tout fust consommé, qui diroit aucunesfois jour et nuyt ne se bougoit personne dillec. Si veilloit tousiours quelque prince plus prochain tenant une grant couppe dor en ses mains a tout laquelle il respandoit par plusieurs foys du vin en terre par manière de sacriffice en appel lant lame de son parent ou amy et en le plourant et regrectant sans cesser comme faisoit Achilles du gentil Patroclus. Et quant tous les corps estoient consumez, lors on estaingnoit le feu de vin vermeil et recueilloit on solemnellement et reuereemment les os tous blancz du prince ou du Roy. Et a ce propos disent aucuns, que les corpz des Royz dorient ains que de les mectre au feu estoient enuelopez dun drap dont la femme (1) est naturellement de telle estoffe quelle ne brûle poinct. Et par ce moyen estoient gardez les os des princes sans estre meslez auec les autres. Iceulx os et cendres ainsi recueilluz, on les colloquoit par grant cerimonie en ung vaisseau dor dargent ou darain bien couuert. Et les gardoit on en grant dignité pour mectre en sépulture. Combien que la Royne Arthemise de carie ne voulut autre vaisseau pour les cendres de son très cher frère et mary le Roy Mauseolus que son propre corps (2). Car par une inuention non acoustumee elle mesmes les print et usa toutes auec certain brunaige, disant quelle neust sceu bailler aux cendres de son espoux nul autre plus cher ne plus amoureulx réceptacle que son propre corpz.

(!) La trame ? En provençal fremna = frange.

(2) Cf. notre tom. IV, p. 71 (Couronne Margaritique).