LETTRE DE JEAN LEMAIRE A MARGUERITE D'AUTRICHE

Original.

Très-haulte, très excellente princesse et ma très redoubtée et souveraine dame, si très humblement que faire puis à vostre bonne grâce me recommande.

Madame, il a pieu à vostre très haulte bénignité, visiter le moindre de voz serviteurs et lui escripre, non seullement lettres plaines de grâce et de benivolence, signiffyant avoir prins en gré mon très petit service pour le passé, en me commandant oultre plus continuer les choses commencées, mais davantaige par vostre royalle et immortelle libéralité m'avez ottroyée ce qu'apaines osoye je demander, combien qu'il me fust nécessaire, non me confiant l'avoir desservy, cest assavoir creue de mes gaiges de IIII s. pour jour. Et qui plus est, il vous plait me donner certain espoir et asseurance encoires d'autre bien futur dont, , Madame, en toute très humble inclination de cueur et de corpz, je fais action de grâces et mercy à vostre très noble et très clere vertu.

Madame, combien que je pense et cognoisse, par conscience de ma propre insouffisance, que vostre contentement de mon service jusques icy procède plus de la très

facille humanité vostre que de la satisfaction du debvoir mien, toutes voies je mettray paine déplus en plus à ce que Vostre Haultesse apperçoive doresenavant que la resplendeur (1) des biens que vous me faictes esclarcist les ténèbres de mon rude esperit ; et ce pendant verrez s'il vous plait, ung petit traictié par moy translaté de langue ytalienne en la nostre des Gestes de Sophy (2) et de la prinse d'Orant en Barbarie.

Très haulte, très excellente princesse, ma très redoubtée et souveraine dame, Dieu vous doint le comble de voz très haulx et très nobles désirs. Escript en vostre ville et université de Dole, le XVIII jour de décembre M. Ve et IX. Vostre très humble et très obéissant serf. Lemaire.