I. LIVRE DES AMOURS

Cherche, Cassandre, un Poëte nouveau, Qui après moy se rompe le cerveau A te chanter : il aura bien affaire, Fusse un Bayf, s'il peut aussi bien faire. Si nostre empire avoit jadis esté Par noz François aussi avant planté Que le Rommain, tu serois autant leûe Que si Tibull' t'avoit pour sienne esleûe : Et neantmoins tu te dois contenter De veoir ton nom par la France chanter, Autant que Laure en Tuscan anoblie Se voit chanter par la belle Italie.

Or pour t'avoir consacré mes escris, Je n'ay gaigné sinon des cheveux gris, La ride au front, la tristesse en la face, Sans mériter un seul bien de ta grâce : Bien que mes vers et que ma loyauté Eussent d'un tygre esmeu la cruauté.

Et toutesfois, je m'assure quand l'âge Aura donté l'orgueil de ton courage, Que de mon mal tu te repentiras, Et qu'à la fin tu te convertiras :

Et ce pendant je souffriray la peine, Toy le plaisir d'une liesse veine De trop me veoir languir en ton amour, Dont Nemesis te doit punir un jour.

Ceux qui amour cognoissent par espreuve, Lisant le mal dans lequel je me treuve,

Ne pardon'ront à ma simple amytié

Tant seulement, mais en auront pitié.

Or quand à moy je pense avoir perdue

En te servant ma jeunesse espendue

De ça de là dedans ce livre icy.

Je voy ma faulte et la prens à mercy,

Comme celuy qui sçait que nostre vie

N'est rien que vent, que songe, et que folye.

J'alloy roulant ces larmes de mes yeux, Or'plein de doute, ore plein d'espérance, Lors que Henry loing des bornes de France Vengeoit l'honneur de ses premiers ayeux :

Lors qu'il trenchoit d'un bras victorieux Au bord du Rhin l'Espagnole vaillance, Ja se traçant de l'aigu de sa lance Un beau sentier pour s'en aller aux cieux.

Vous sainct troupeau, mon soustien et ma gloire, Dont le beau vol m'a l'esprit enlevé, Si autrefois m'avez permis de boire

Les eaux qui ont Hésiode abreuvé, Soit pour jamais ce souspir engravé Au plus sainct lieu du temple de Mémoire.