SCENE I

CAMBIEN et THEMOLE.

IE crain que nous n'ayons mal conseillé Cinthien de descouurir les secrets de sa pensée au Negromant.

THEMOLE.

Ha ne craignez que, les ayant pris soubs sa foy auec tant de iuremens, il les publie iamais.

CAMBIEN.

le ne le dy pas pour ce que ie craigne qu'il les publie, mais que luy, connoissant ores comme vont les choses, il n'œuure au contraire et face auec quelque art diabolique que Cinthien retire son cueur de Lauinie et le transporte tout à l'amour d'Emilie.

THEMOLE.

Les cinquante florins que vous luy offrez auront en luy plus de force, croyez-moy, qu'il n'a vers les autres auec sa magie. Allez seule-

ment, aprestez les deniers, et faittes paction auec luy.

CAMBIEN.

le vas à Nanne et me les feray bailler par elle.

THEMOLE.

Portez cinquante florins.

Ouy bien aisément, pour ce que la mère de Lauinie à sa mort luy laissa vne chaisne auec certains anneaux, vn carquan et semblables choses d'or, qui toutes ensemble peuuent monter au prix de cent escus ou enuiron. Ma seur l'auoit tousiours gardée à fin que s'il adulent qu'elles retrouuent son père, elles luy puissent faire voir auec cest'enseigne que Lauinie est sa fille. Ores m'estant escheu ce besoing, ie changeray d'intention et en feray tant engager et vendre que l'en tireray bien tost cinquante florins, comme cela vient bien à point.

CAMBIEN.

Or ie m'enveus aller en la maison.

THEMOLE.

Voyla Cinthien et le maistre.

CAMBIEN.

Et bien. Laisse les sans nous, tant qu'ils ayent conclu la fin dececy : puis Cinthien nous le fera entendre tout à loysir.