CHAPITRE SIXIÈME

assez pour en respandre par les membres et pour en retenir dans le cueur.

Tristesse, conceue par un mauvais et facheux object, ramasse, rasserre et amoncelle tous les esprits respandus et diffuz par tout le corps auprès du cueur, telle fois (1) en si grande habondance et selon la grandeur du subject, que le cueur, saisy et assailly de tant d’esprits, est contrainct de s’estouffer.

Or, Sire, de cela que nous sentons en nous mesmes et qui est en nous mesmes, il n’en fault parler à Aristote ny à Platon, car il fault, en cela, se servir de tesmoing. Nous pouvons bien tromper les autres, mais nous ne sçaurions nous tromper.

Or, pource que, mille fois, j’ay senty des Joyes extresmes et des tristesses, j’en parleray comme de mon faict. Je confesse avoir esté plus esmeu et plus tourmente de la tristesse que de la joye: car volupté, plaisir, réjouissance et joye sont totallement amies de nature, qui m'ont faict rire, saulter, dancer, jouer et tressaillir d’aize.

Au contraire la Tristesse, ennemye de nature, m'a tousjours rendu chagrin, despit (2), hagard, farousche et refrongné, et combien que, entre deux extrémitez il n’y a point de comparaison, toutefois, Sire, pour obéir à vostre commandement, je concluray que la Joye, d'autant qu’elle est dilatée et respandue et très-amye de nature, n’est pas si violente, si forte, si aigre que la tristesse, qui nous apporte une grande perturbation et tout soudain et tout à coup, nous presse, nous serre et nous estouffe le cueur.

(1) Quelquefois.

(2) Pour débpité, triste, ennuyé.