LE CONNÉTABLE DE MONTMORENCY

A SIMON RENARD, AMBASSADEUR EN FRANCE

(Ambassades de Renard, V, a. )

Blois, 29 avril 1 556.

Monsr l'ambassadeur : Je ne vous diray pas à ceste heure l'aise et contentement que le roy a receuz de sçavoir que ayez esté esleu pour venir ambassadeur après de luy; ce sera quant je vous verray, comme j'espère faire bientost. Maiz ayant sceu que vous estes en chemyn pour approcher ceste court, et veoyant que le roy desloge demain pour aller coucher à Chambort, où il doit séjourner cinq ou six jours, j'ay advisé vous faire sçavoir par ce porteur exprès que j'ay donné ordre à faire garder et retenir vostre logeis à Saint-Dyé, près dudit Chambort, comme vous sçavez; vous priant me faire entendre par luy, lequel vous me renvoyerez incontinant, quant vous y pourrez estre, afin que je vous advertisse du temps que ledit seigneur sera prest et disposé de vous veoir, et aussi vous dire que , si vostre santé n'est bonne et forte, vous ne vous hastiez que bien à point, estant asseuré que à toute heure vous serez le très-bien venu et agréablement receu d'icelluy seigneur et de toute la compaignye. Priant Dieu, monsr l'ambassadeur, vous donner ce que plus désirez. De Bloys, le xxixe jour d'avril i 556.

On pourra bien demourer neuf ou dix jours à Chambort, de sorte que si vous avez plaisir de séjourner ung jour ou deux à Nostre-Dame de Cléry pour vous reposer, faire le pourrez pour vostre santé, et m'en pourrez advertir.

Vostre bon amy,