MARGUERITE D AUTRICHE

AUX PRÉSIDENT ET CONSEILLERS DU CONSEIL DE FLANDRE (Mémoires de Granvelle, I, 81 v°.)

Malines, i3 mars i524, V. S.

Marguerite, archiduchesse, duchesse et comtesse de Bourgon-

gne, etc. régente et gouvernante, etc.

Chiers et bien-aymez , ayant entendu qu’aulcuns ont mis doubte en la bataille d’Italie, en la prinse du roy de France et en la deffaite des siens , dont vous escript, pour autant que n’en eussions lettre de monsieur le duc de Bourbon, ne le vice-roy; nous vous advisons que ceste nuict est arrivé l’escuyer Grospain, avec lettres desdicts sieurs , en conformité desquelles il nous a certifïié avoir esté en la dicte bataille et la prinse du roy de France par la main du vice-roy, et que luy-mesme aaydé à désarmer le roy en ladicte prinse. Aussy sont mortz des principaulx personnaiges du royaume , selon le billet qu’il nous en apporte , duquel vous envoyons la copie , et qu’à ladicte bataille ne sont mortz que cent cinquante hommes des nostres, et entre les aultres le marquis du Cundat; et que ledict sire roy a mandé faire délivrer le prince d’Oranges , le sieur de Bossut et aultres des nostres, qui estoyent prisonniers. Nous vous requérons faire prier Dieu pour les âmes des trespassez , luy rendre grâces de la victoire qu’il a envoyé à l’empereur, et luy prier pour sa longue vie et prospérité, honneur, estime et réputation, au bien, repos et seureté de luy et de ses pays et subjectz , et que la longue guerre que avons jà heu et encoires avons , puisse terminer par bonne et per-

durable paix. Et sur ce, chiers et bien-aymez, Nostre-Seigneur vous ait en sa grâce. Escript à Malines, le xmejour de mars, l’an xvcxxmi.

MARGUERITE

Et plus bas :