DE BOURGOGNE AU SIEUR DE SAINT-BONNET

(Apologie de Charles V, 287.)

Fontarabie, 16 juillet i5î8.

Monsieur, j’ay receu voz lectres du ixe de ce moys faisant mention que ledict roy vostre maistre vous a commandé, avant que me donner parmission d’entrer en ses pays, savoir de moy si de la part de l’empereur, mon souverain seigneur, j’apporte le camp asseuré, ce que dictes que ledict seigneur vostre maistre entend que je face, et que , ce faisant, me souffrez et laissez passer par tous ses pays ; désirant que vous envoyé par escript, et à la vérité, si j’ay autre charge que celle de l’asseurance dudit camp.

Monsieur, quant me partiz de l’empereur, je n’euz commandement de sa majesté de déclairer ma charge à aultre quelconque que au roy de France; à ceste cause j’ay incontinant envoyé en postes

devers sa majesté pour savoir son bon plésir de ce que vous dois respondre. Sadicte majesté m’a commandé vous faire savoir que je porte l’asseurance du camp, et aultres choses concernans le combat, et responce au cartel dudict roy vostre maistre ; parquoy de rechief vous supplie, monsieur, me faire avoir saulf-conduit dudict sieur roy, afin de pouvoir aller exploicter ma charge librement et saulvement à la personne dudit sieur roy vostre maistre , comme l’empereur le m’a commandé , et ainsi que Guyenne l’a fait par deçà , sans qu’il y ait heu délay, ny ayt esté requis ny pressé de déclairer sa charge à aultre que à la personne de sa majesté ; et sur ce vous plaise m’envoyer vostre responce le plus tost que possible sera. Monsieur, je prie Dieu vous donner bonne vye et longue.

LE SIEUR DE SAINT-BONNET