GRENIERS A SEL

Sera le Roy très humblement supplyé, en considération de la grande paouvreté de son peuple, le voulloyr descharger des grandes impositions qui ont esté mises et se lièvent à présent sur le sel, qui n'importe de moings au dit paouvre peuple, que faict le payement des tailles, et est l'usage moings nécessaire aulx riches qu'aux paouvres, qui ne mangent, eulx leurs femmes et enttans, que du pain d'avoyne et grosse mouture, et du potage au sel et à l'eau, ne pouvant vivre sans sel, et icelles impositions remettre en Testât qu'elles estoyent du règne du feu Roy Henry ; et que ledit sel ne soit exposé en vente qu'il n'ayt esté reposé et essuyé par le temps de trois ans, tant en la loge que au grenier, par ce qu'aultrement il n'est salubre au corps humain.

Qu'il soit interdict et deffendu aulx officiers desdits greniers d'estre fermiers etassotiez, ou pentionnaires des fermiers d'iceux greniers, pour esvitter aulx abuz et malversations qu'y commettent lesdits officiers, qui particyppent èsdites fermes, jugeant à leurs profficts contre le paouvre peuple, infinies grosses amendes et confisquations, le payement et vexations desquelles n'importe audit peuple de moings que ladite taille, estant par ce moyen juges et partyes, contre tout droict et justice. Et à ce que tels abus ne demeurent impugnis, que leur procès leur soit faict et parfaict extraordinairement; et oultre, lesdits officiers desdits greniers, érigez depuis le règne du roy Louis douziesme, soyent et demeurent supprimés. Que l'antienne règle faicte sur l'administration des finances du Roy soit gardée et observée, révocquant, sy c'est le bon plaisir de Sa Majesté la forme introduite puis quelques

temps, appeliez deniers contans mis es mains du roy, que ceux qui ont espuisé les finances publiques ont inventée, affin de faire tomber les dites finances en leurs mains, et oster toute congnoissance de la distribution d'icelles ; et que dorénavant ne soictfaict aucuns dons qui ne soyent vérifiez et esmologués en la Chambre des Comptes, à peyne de crime de péculat contre ceux qui auront poursuivis et obtenus les dits dons, et de radiation aux financiers qui les auront acquittés sur leurs comptes, sauf au Roy de réserver telle somme qu'il aduisera pousses menus plaisirs, ainsi qu'il se faisoit entiennement.

Qu'il plaise au Roy faire jouir ses officiers qui' ne seront supprimés, tant de la justice que de la finance, de leurs gaiges, affin de leur oster toutte occasion de mal verser et d'opprimer le peuple, et aussy faire jouir ceulx qui ont des rentes sur ses domaynes, aydes gabelles, tailles et équivallens, sans en retrancher ny arrester aucune chose, et leur faire payer les arréages du passé.

i Qu'il plaise aussi à Sa Majesté que ce qui a esté ordonné pour le règlement particulier de l'exercice de la justice et des finances, que pour la pollice généralle de ce royaume, tant par les ordonnances de l'an MVCXXXIX, édict de l'assemblée des Estats tenus à Orléans, édict faict à Moulins, édict fait à Bloys, aussi en l'assemblée desdits Estats, aucuns édicts non contraires, ny derrogeans au concile de Trente, aulx saincts décrets, ny à l'édict qui interviendra aux dits Estats assignez de présent à Bloys et aultre, qui faisoit et estoit observé dudit temps du Roy Louis douziesme, soyent inviolablement entretenus et gardés ; abrogeant et révocquant, en ce faisant par sadite Majesté, tous aultres édicts et ordonnances au contraire. Et pour cest effet, qu'il soyt commis personnages suffisans et capables pour rédiger touttes ordonnances conformes à ce que dessus en ung volume ordonné par rubricques, affin que les aultres ne soyent plus en usaige.

Que le Roy sera très humblement supplyé de ne admettre en son conseil, ny prendre advis pour la dellibération et résolution qui sera prinse sur les plaiuctes et doléances qui se

feront aulx présens Estais , d'aucuns de Messieurs de son Conseil d'Estat, par ce qu'ils leur sont suspects et les récusent, d'aultant que le peuple est deuement informé qu'aucuns d'eulx ont espuisé la plus part des finances du Roy et douné les moyens et inventions d'opprimer ledit peuple, dont y a ung milion de personnes qui eu sont morts de faim et nécessité, et deulx fois aultant d'aultres réduicts à extrémités et misérable paouvreté, pour lardante et insatiable avarice de ceulx qui sont près la personne du Roy, auquel ils ne peuvent souffrir aucune finance pour l'applicquer à leur avarice, et jusques là que le Roy s'est treuvé tellemeut desnué des finances, qu'il n'avoit pour satisfaire à sa despence ordinaire, combien que par les inventions indues d'iceux, il soyt levé plus de deniers sur le peuple, depuis le commencement du règne du Roy, qu'il n'a esté durant les règnes des huit aultres Roys ses prédécesseurs, et si énormemement que tous les moyens deffaillans au paouvre peuple, on l'a exécutté pour le payement des tailles et subcides, jusques aux couvertures et charpenteries de leurs maisons, après les avoir exécuttés aulx instruments dont ils gaignent leurs vyes ; mesmes tirer le pain du four qu'ils, leurs femmes et enffants debvoient manger, es années chères et aultres. Et nonobstant, ledit paouvre peuple est foullé de la gendarmerye, battu, outragé e* tué, femmes et filles viollées, et tous aultres actes de inhumanités et cruaultés tellement excessives qu'il n'y a barbares ny tigres qui puissent !Jpis faire, par faulte que lesdits gens de guerre ne sont payés ; et oultre, nonobstant lesdites immenses levées de deniers, ne se paye aucune chose, mesmes les rentes que le Roy doibt, et gaiges d'officiers sont le plus souvent arrestés partout endroict, moyens inventés et escogités pour ériger nouveaux offices, augmenter les nouveaux subcides et acroistre les antiens, non au profiict et service du Roy, mais pour ceulx qui sont autour de sa personne, à l'oppression de son peuple.

Qu'il plaise à Sadite Majesté, pour repurger les malversations, faultes et abus qui se commectent en tous les ordres et

estats de son royaume, et pour pourvoir aux affaires par l'advis de ses Estats , ordonner que lesdits Estats généraux tiendront de six ans en six ans.

(En ceste endroit est signé en la marge, Bourin.)

Faict et arresté par nous, nommés et depputés du tiers Estât du duché et bailliage de Touraine soubsssignés,pour estre porté en la ville de Blois, en l'assemblée et congrégation généralle du tiers Estât assignée par Sa Majesté au quiuziesme du présent mois de septembre de l'an présent, mil cinq cens quatre vingt h uict; et à ceste fin, estre dellivré aux deulx depputés généraux desdits duchés et bailliages de Touraine, le sabmedy, troisiesme jour de septembre mil cinq cens quatre vingt huict, en la salle des jacobins dudit Tours, heure de huict heures du matin. Ainsy signé : Berziau, Dupuy,Vynault, Morin, Cohu, Morin, Delaunay, Degarence, Brodeau, Bastard, Bossay, Fontenyer, Delabarre, Bridonneau, Cormasson, Malpencé, Barré, Martin Damarron, Lempereur, Lebeau fils, Guimier, Joubert greffier.

Collationné à l'original en pappier, représenté par maistre Mathtirin Duvau, commis au greffe de ceste ville, et à lui rendu par le notaire de nostre Syre, à Tours, soubsigné, le vingt sixziesme jour dejuing mil six cens quatorze.

DUVAU (avec paraphe).

Et plus bas : F. NAU (avec paraphe).