VI. — COMPLAINTE

[ on cuer, m'amour, ma dame souvereinne, Arbres de vie, estoile tresmonteinne, Rose de may de toute douceur pleinne,

Gente et jolie, Vous estes fleur de toute fleur mondeinne Et li conduis qui toute joie ameinne, Ruissiaus de grâce et la droite fonteinne;

Je n'en doubt mie.

Toute biauté est en vous assevie Et vo bonté nuit et jour mouteplie ; Pour ce plaisence ha dedens moy norrie

Joie sans peinne, Et si m'a tout en vostre signourie Rendu et mis, et par noble maistrie Ravi mon cuer qui usera sa vie

En vo demeinne.

Dame, que j'aim plus amoureusement, N'onques amans n'ama certeinnement, Tous vostres sui ; mais c'est si ligement

Que sans partir Vous ameray de cuer, très loyaument, Et serviray toudis très humblement Et si feray vo dous commandement

Jusqu'au morir, Ne ja n'avray cuer, penser ne désir De vostre honneur en nul cas amenrir, Qu'à moy poez, douce dame, merir

En un moment Plus que ne puis en mil ans desservir. Pour ce sui mis dou tout à vous servir En espérant qu'aie ce que désir

Procheinnement :