CCXIV. — BALADE

M°*" je dont sans avoir vostre amour, Dame, que j’aim, crein et desir, par m’ame, Plus loiaument, mieus et plus par honnour Qu’onques amans ne pot desirer dame ?

Certes, je croy bien qu'oïl, Quant mon service et moy tenez si vil Que ne daingniez veoir ne resgarder Moy, las! dolent, qui muir pour vous amer.

Douce dame, vostre fine douçour Mon loial cuer art sans feu et sans flame Et le norrit en amoureuse ardour Qui par desir croist toudis et enflame ; Et quant vostre corps gentil Remir, il fait par engin trop soutil Trambler sans froit et sans chalour suer Moy, las ! dolent, qui muir pour vous amer.

Helas ! dolens, souvent souspir et plour, Bien le savez, pour vous qu’aime sans blame, Mais vos durs cuers n’a pité de mon plour Ne des meschiés ; dont mis seray sous lame, Car je vif en tel essil

Que cuer et corps pour vostre amour essil, Quant ne daingniés d’un regart conforter Moy, las ! dolent, qui muir pour vous amer.