DES MŒURS ET CONDITIONS DE PANURGE

Panurge estoit de stature moyenne, ny trop grand, ny trop petit, et a voit le nez un peu aquilin, fait à manche de rasoir, et pour lors estoit de l’aage de trente et cinq ans ou environ, fin à dorer comme une dague de plomb, bien galant homme de sa personne, sinon qu’il estoit quelque peu paillard et subject de nature à une malàdie qu’on appelloit en ce temps là

Faute d’argent, c’est douleur sans pareille.

Toutesfois, il avoit soixante et trois manières d’en trouver tousjours à son besoin, dont la plus honorable et la plus commune estoit par façon de larrecin furtivement faict. Malfaisant, pipeur, beuveur, bateur de pavés, ribleur (1), s’il en estoit en Paris;

Au demourant, le meilleur fils du monde.

Et toujours machinoit quelque chose contre les sergens et contre le guet.

A l’une fois, il assembloit trois ou quatre bons rustres, les faisoit boire comme templiers sur le soir; après les menoit au dessous de Saincte Geneviefve, ou auprès du college de Navarre, et, à l’heure que le guet montoit par là (ce que il cognoissoit en mettant son espée sus le pavé, et l’oreille auprès, et lorsqu’il oyoit son espée bransler, c’estoit signe infaillible que le guet estoit prés), à l’heure donc, luy et ses compaignons prenoient un tombereau, et luy bailloient le bransle, le ruant de grande force contre la vallée, et ainsi mettoient tout le pauvre guet par terre,

(1) Coureur.