EST L’OR SUBTILEMENT TIRÉ DE FRANCE EN ROME
« Je vouldrois, dist Epistemon, avoir payé chopine de trippes à embourser, et qu’eussions à l’original collationné les terrifiques chapitres, Execrabilis, De multa , Si plures , De Annatis per totum, Nisi essent, Cum ad Monasterium, Quod düectio, Mandatum , et certains aultres, lesquelz tirent par chascun an de France en Rome quatre cens mille ducats, et davantaige. — Est ce rien cela ? dist Homenas ; me semble toutesfois estre peu, veu que la France la très christiane est unique nourrice de la court Romaine. Mais trouvez moy livres on monde, soyent de philosophie, de medecine, des loix, des mathematicques, des lettres humaines, voire (par le mien Dieu) de la saincte Escriture, qui en puissent autant tirer? Poinct. Nargues, nargues. Vous n’en trouverez poinct de ceste auriflue (1) energie, je vous en asceure. Encore ces diables heretiques ne les veulent apprendre et sçavoir. Bruslez, tenaillez, cizaillez, noyez, pendez, empaliez, espaultrez, demembrez, exenterez (2), descouppez, fricassez, grillez, transonnez, crucifiez, bouillez, escarbouillez, escartelez, debezillez, dehinguandez, carbonnadez ces meschans heretiques decretalifuges, decrelalicides, pires que homicides, pires que parricides, decretalictones du diable. Vous aultres gens de bien, si voulez estre dicts et réputés vrais christians, je vous supplie à joinctes mains ne croire aultre chose, aultre chose ne penser, ne dire, n’entreprendre, ne faire, fors seulement ce que contiennent nos sacres decretales et leurs corollaires : ce beau Sixième, ces belles Clémentines, ces belles Extravaguantes. O livres déifiques ! Ainsi serez en gloire, honneur, exaltatation, richesses, dignités, prelations en ce monde, de tous révérés, d’un chascun redoubtés, à tous préférés, sus tous eleuz et choisis. Car il n’est sous la chappe du ciel estât duquel trouviez gens plus idoines à tout faire et manier que ceux qui, par divine prescience et eterne prédestination, adonnés se sont à l’estude des sainctes decretales. Voulez vous choisir un preux empereur, un bon capitaine, un digne chef et conducteur d’une
(1) Tirant l’or.
(2) Eventrez.
