COMMENT LA QUINTE ESSENCE GUARISSOIT LES MALADIES PAR CHANSONS

En la seconde gallerie nous fut par le capitaine monstre la dame jeune, et si avoit dix huit cens ans pour le moins, belle, délicate, vestue gorgiasement, au milieu de ses damoiseiles et gentils hommes. Le capitaine nous dist : «Heure n’est de parler à elle, soyez seulement spectateurs attentifs de ce qu’elle fait. Vous en vostre royaume avez quelques roys, lesquels fantastiquement guarissent d’aucunes maladies, comme scrophule, mal sacré, fiebvres quartes, par seule apposition des mains. Ceste nostre royne de toutes maladies guarit sans y toucher, seulement leur sonnant une chanson selon la compétence du mal .» Puis nous monstra les orgues, desquelles sonnant, faisoit ses admirables guarisons. Icelles estoient de façon bien estrange : car les tuyaux estoient de casse en canon, le sommier de gajac, les marchettes de rubarbe, le suppied de turbith, le clavier de scammonie.

Lors que considérions ceste admirable et nouvelle structure d’orgues, par ses abstracteurs et aultres siens officiers, furent les lepreux introduits : elle leur sonna une chanson, je ne sçay quelle; furent soudain et parfaictement guaris. Puis furent introduits les empoisonnés : elle leur sonna une au-