PROLOGUE CAPITAL

Pour demonstrer à chascun populaire les grandes et mervilleuses hystoires du noble roy Gargantua, j'ay bien voulu prendre la peine de translater ceste présente hystoire de grec en latin , et de latin en bon françoys, qui traicte de sa nativité, et qui furent ses père et mère, comme vous pourrez ouyr cy après. Pour le commencement de ceste vraye cronicque , vous debvez savoir comme nous tesmoingne l'escripture de plusieurs cronicqueurs, dont nous en laisserons aulcuns, comme Guaguin, André, maistre Jehan Le Maire, et plusieurs aultres semblables, lesquelz ne servent de riens à propos quant à ceste présente hystoire; mais nous prendrons Tristan de Lyonnoys, Tsaye le Triste, Huon de Bordeaulx, Jourdain de Blaues, Lancelot du Lac, Guerin Mesquin, Parceval le Galloys, Mabriam, Ogier le Dannoys, les quatre filz Hemon, et tous les chevaliers de la Table Ronde, et aultres semblables, dont en y a assez pour approuver la vérité de ceste présente hystoire, comme vous verrez plus à plain.

Variante de F édition de 1 546 .