CHAPELET

Pour le mieux faites révérence Aux vieilz remplis d’entendement.

Retenez mon enseignement,

Se voulez avoir sapience.

Aux vieilz est deue obédience :

On ne sçauroit dire autrement.

Pour le mieux faites révérence Aux vieilz remplis d’entendement.

L’honneur vous revient proprement Quand vous leur donnez audience.

Retenez mon enseignement Se voulez avoir sapience.

C’est la paix de la conscience ;

C’est vostre bien très grandement.

L’on vous fera pareillement,

Quand vieilz serez en décadence.

Pour le mieux faites révérence Aux vieilz remplis d’entendement.

Retenez mon enseignement,

Se voulez avoir sapience.

Du temps de la vostre innocence , Ils vous ont nourris doulcement.

Recongnoissez pareillement Leur antiquité et prudence.

Pour le mieux faites révérence Aux vieilz remplis d’entendement.

Retenez mon enseignement,

Se voulez avoir sapience.

Pour honneur de fée et science , Honorer les faut haultement.

Pour le mieux faites révérence Aux vieilz remplis d’entendement.

Faites tost leur commandement, Aprenez leur expérience.

Retenez mon enseignement Se voulez avoir sapience.

Obéyssez en patience,

S’ils vous corrigent rudement.

Respondez leur très humblement.

En leur donnant pleine audience.

Pour le mieux faites révérence Aux vieilz remplis d’entendement.

Retenez mon enseignement Se voulez avoir sapience.