CXXX« HYSTOIRE

Comment le comte d'Erby se party de Gascongne pour aler en Engleterre, et comment il conquist la ville de Poitiers, Monstreul-Bonnin et Saint- Jehan en Poitau.

Tantost après que le duc de Normendie se fut party de devant l'Aguillon, avint que le conte d'Erby eult en volenté de passer mer et d'aler par devers le roy d'Engleterre, et se party du pays de Gascogne à tout ses gens, et passèrent

plusieurs villes et plusieurs chasteaulx, et vindrent à l'entrée de Poitiers, où il y avoit garnison de par le roy de / France. Et quant ils vinrent à la porte, le conte d'Erby manda aux chevaliers et aux bourgois de la ville qu'ils volsissent la ville rendre au conte d'Erby. Et la ville respondy qu'ils n'avoient point en conseil, ne en volenté de rendre la ville, et s'apparillèrent chevaliers et bourgois pour eulx et la ville deffendre, et fisrent leur assamblée en une grande place, comme gens qui peu sçavoient de guerre. Et entandis qu'ils faisoient leur assamblée et qu'ils ordonnoient leurs besongnes, le conte d'Erby et ses gens assallirent fort et roid aux fortresses de la ville de Poitiers, et fisrent tant qu'ils furent en la ville et cryèrent : « A l'arme ! » et commenchèrent à décopper et à tuer et à bouter les feux en aucuns lieux, et furent les gens de la ville tantost sy desconfis que la plus grande partye s'enfuioit par les églises et par les fortresses, et aucuns se combatoient et deflfendoient ; et aucuns se rendirent, sauf leurs vies et leurs biens, et là eult moult grant gaing, et fut grant partye de la ville arse et gastée. Sy y séjournèrent les Englecqs VI jours ou environ, et se charga chascun de grant avoir. En la fin la ville s'apaisa, et puis se party le conte d'Erby et ses gens, et s'en alèrent droit à Monstreul-Bonnin oîi on faisoit la monnoye du roy de France, et prinrent par force la ville, et là gaignèrent-ils moult d'avoir. Et puis, après ceste prinse, chevauchèrent-ils par devers la Rocelle en Poitou, ardant, gastant, pillant et essillant tout le pays. Et laissèrent quoy la Rocelle, car trop estoit forte, et s'en alèrent à Saint-Jehan-d'Angély et le prinrent par force. Sy y gaingnèrent grant avoir, et y raist et laissa le conte d'Erby garnison de par le roy d'Engleterre. Puis s'en party le conte d'Erby et ses gens, hors mis une

partye qu'il en laissa en ladite ville, et monta en mer à tout ses aultres gens. Sy emportèrent et emmenèrent moult grant avoir, et tant singlèrent qu'ils vindrent en Engleterre, où ils furent moult bien venus et festoies. Sy séjournèrent droit là une espasse.

Or revenrons en une aultre matère.