CXXXIII<= HYSTOIRE

Comment Marguerite, royne d'AUemaigne et empereys des Romains, contesse de Haynaut, de Holande et de Zélande, vint à Yppre voir la royne d'Engleterre sa suer.

Après celle bataille des Englecqs contre les Escoçois, devant la cité de Durâmes, en Engleterre, en laquelle le roy David d'Escoce et ses hauls barons furent prins, et que le roy et la royne d'Engleterre en eurent certaines nouvelles devant Callais, dont ils eurent grant joie, en ce tamps estoit Margueritte, royne d'AUemaigne et empereys des Romains, et suer à la royne d'Engleterre, venue en Haynault pour relever la conté qui luy estoit escheue de par le conte Guillarae de Haynault leur frère, et avoit ladite empereys mandé la royne d'Engleterre sa suer. Et le roy Edouart, son mary, ne luy volut donner congiet d'aller plus avant que jusques à Yppre tant seulement ; et ainsy le remanda la royne à l'empereys par le message mesmes, et qu'elle le trouveroit à Yppre. Et surces'apparilla la royne moult ricement et se partit de l'ost, et fist le roy aler avoecques luy le conte de Werwich et grant plenté de josnes chevaliers et escuiers à moult belle maisnie, et ce archiers. Et vint à Yppre avant et plus tost que l'empereys y fust. Et d'aultre part l'empereys se mist à la voye et s'en vint vers Yppre ; et quant la royne d'Engleterre sceult que l'empereys approchoit Yppre, elle ala à rencontre de luy moult noblement. Et quant elles furent ensamble , sy s'entr'acointèrent moult honnourablement l'une l'autre, comme celles qui n'avoient veu l'une l'autre,

grant tamps avoit. Et séjournèrent à Yppre une espasse, et leur fîst la ville moult d'honneur et moult de beaux présens, sycomme à leur dame la royne d'Engleterre. Et ainsy latenoient-ils au tamps d'adont. Et quant les deux dames eurent là séjourné tant qu'il leur pleut, elles prinrent congiet aux bourgois et aux bourgoises de la ville, et les remerchyèrent de leurs courtoisies. Et à tant s'en partirent les II dames : sy s'en râla la royne d'Engleterre en l'ost devant Callais, et l'empereys s'en revint en Haynault.

CXXXIIIl» HYSTOIRE.

Comment le roy de France envoya deux cardinaulx au roy d'Engleterre au siège devant Callais pour faire paix ou trêves.

Vray fut que une grande espasse après ce que le roy de France et le duc de Normendie, son fils, estoient à Paris, ils eurent en conseil qu'ils envoieroient au roy d'Engleterre et à son conseil II cardinaulx pour parlementer, pour avoir trêves ou paix : sy y allèrent les cardinaulx. Et quant ils vindrent devant Callais, ils ne peurent oncques parler au roy d'Engleterre, de II fois ou de III qu'ils y furent. En la fin la response du roy fut tele que, s'ils vouloient parlementer au roy d'Engleterre, qu'ils fissent tant au roy de France que monseigneur Gaultier, son chevalier, fust délivrés de sa prison qu'il tenoit à mauvaise cause et sur sauf-conduit. Et quant les cardinauls oyrent che, ils s'en râlèrent devers le roy de France et luy contèrent laresponse du roy d'Engleterre, et tant parlèrent les II cardinaulx au

roy de France, et le duc de Normendie son fils, que monseigneur Gaultier de Mausny fut délivrés, parmy payant ses frais, qui moult grans furent. Et au départir, le duc de Normendie lui fist présenter une moult riche couppe dorrée et esmaillye à pierres et à perles, à laquele couppe prendre il mist grant reffus. En la fin il le prist, et puis se party, et chevaucha tant qu'il vint devant Callais, où il trouva le roy, et luy conta ses aventures et comment il avoit ouvret. Et quant il eult esté devant Callais une espasse, il s'en ala à Valenchiennes et fist enterrer les os de son père qu'il avoit fait rapporter de la ville de la Riolle en Gascogne, et fist faire son obit honnourablement ainsy qu'il appertenoit à chevalier, et fist faire ung noble sarcut dalés sa femme aux Frères-Mineurs, et ce fut environ le my-mars, l'un de grâce mil 111° XL VI.