CXL« HYSTOIRE

Ung assault grant et mervilleux qui fut des François aux Flamens sur le mont de Cassel, où il y eult grant murdre et grande ochision de l'une partye et de l'autre.

Tantost après ces choses dessusdites, avint par ung vendredy, VHP jour de juing, que le duc d'Ataines et monseigneur de Beaujeu et pluseurs aultres, à tout grant plenté de gens d'armes et de communes, assallirent la ville et le mont de Cassel. Sy fut la ville assallye bien et hardyement, et ceulx de dedens se deffendirent bien et vigoreusement, et se combatirent une grande espasse main à main. Et montoient ces Franchois aux palis et les abatoient ; et furent les Flamens recullés et y perdirent grandement, car moult y eult grant assault et maint homme mort et navré. Et eussent les Franchois gaigniet Cassel , se les Flamens n'eussent eu secours du fils du Courtisien qui vint à la rescousse à tout grant nombre de Flamens et d'Allemans. Et là eult pluseurs hommes prins, abatus, navrés, afFollés et tués ; et firent à celle venue les Flamens et Alemans les Franchois recuUer par force, et y fut tués le seigneur de Mailly, et là eult grande ochision d'une partye et d'aultre, de francqs et de villains. Et se retrayrent les Franchois à tant par devers le roy qui se cuidoit aler logier et faire son fort sur le mont de Cassel, mais il n'y ala mye à celle fois.