CXLI« HYSTOIRE

Ung assault et ung brùlement de pays que fisrent les François à la Leue-Saint-Vast.

Le merquedy après siévant que l'assault grant et mervilleux eult esté au mont de Cassel. sy comme vous avés oy, eult ung assault que les Franchois firent à une ajour- née à la Leue-Saint-Vast, du seigneur de Monmorency, du seigneur de Beaugeu et du seigneur de Fiennes, à tout grant plenté de gens d'armes et de Bretons. Et là furent les Flamens sourpris en leurs lis, tués et ars, et s'enfuioit qui pooit à sauveté : sy fut la ville de venue arse et pillye, et V aultres villes ossy en celle matinée ; et tuèrent ce qu'ils peurent aconsiévir, d'hommes, de femmes et d'enffans. Et en la fin, ainsy que à moult grant paine Flamens se retiroient et raloioient avec les fuians, ils recuUèrent et reboutèrent les François, lesquels se fourvoioient ; car mye ne sçavoient les passages, et sy estoient trop avant aies. Sy en tuèrent les Flamens grant plenté et XIIII chevaliers et bien LVI tournicles de haulx personnages, sans les aultres. Sy eult en celle saison, en pluseurs lieux, pluseurs assauls, rencontres, prinses, rembaremens, adayemens, brûlemens, violences, pillemens, destruisemens, ochisemens, defflouremens, abatemens, murdrissemens, espiemens, jéhinnemens, renchonnemens , appatissemens , tanssemens et toutes manières de mauls et de gastemens qui en guerre se font, oii les Franchois et les Flamens perdirent moult.