CXLVII« HYSTOIRE
Comment ceuîx de la ville de Callais, après ce que le roy de France s'en râla sans les secourir, se rendirent eulx et la ville à la volenté du roy d'Engleterre.
Vrai est qu'il avint en ce jour que ce deslogement fut fait du roy de France gt de ses gens, sy comme nous venons de faire mention, et que le roy d'Engleterre estoit devant la ville de Callais, où il avoit à celluy jour séjourné et tenu siège ung an, III sepmaines moins, ens ouquel siège et ouquel terme ses gens et les Franchois avoient fait et eu maint assaulx et maintes batailles, dont on avoit maints hommes tués et navrés, par terre et par mer, et maints hommes prins et renchonnés d'une partye et d'aultre, et maintes villes pillyes, brullées et destruites, en Gascongne, en Flandres, en Bretaingne, en Escoce, en Engleterre, en France, en Normendie, en Lymosin, eh Poitou, en Angiers et en aultres pluseurs pays, dont che a esté grant domage et pité : sy avint que, quant ceulx de Callais virent, perchurent et vrayement sceurent que le roy de France et son ost estoient deslogiés, et qu'ils s'en raloient sans faire à eulx quelque secours, qui bien en cuidoient avoir ayde, s'ils furent esbahis et desconfortés, ce ne fut point merveilles. Et n'atendirent plus qu'ils n'eussent conseil les ungs aux aultres qu'ils se renderoient à la volenté du roy d'Engleterre, car ils ne se pooient plus tenir, s'ils ne mengoient l'un l'autre. Et sur ce et sur la délibération de leur conseil, monseigneur Jehan de Viane, qui estoit capitaine de tous ceulx de la ville de Callais, vint aux cresteaulx des murs
de la ville le vendredy au matin après la Magdalaine, dont le roy de France estoit deslogiés le joeudy, et crya et prya à ceulx de l'ost du roi d'Engleterre qu'ils le fesissent parler à monseigneur Gaultier de Mauny, et ils le firent. Et y vint monseigneur Gaultier, et parla à luy. Lequel monseigneur Jehan de Viane luy dist son entente de voloir rendre la ville à la volenté du roy d'Engleterre. Sy l'ala monseigneur Gaultier recorder au roy d'Engleterre. Et le roy respondy, parmy le bon conseil qu'ils eurent, qu'il les recheveroit volentiers à merchy, mais qu'ils venissent à amende aiusy qu'il appertenoit, et les rechupt ainsy que vous orës cy-après.
Et le samedy au matin on mist les banières du roy d'Engleterre dedens le chastel et la ville de Callais aux tours et aux cresteaux, et le dimence après le jour Saint- Pierre entrant aoust, V jours au mois d'aoust, l'an mil IIP et XLVII, entra monseigneur Gaultier de Mausny dedens la ville de Callais entre luy et monseigneur de Beaucliamp, et amenèrent monseigneur Jehan de Viane, chastelain du chastel et le capitaine de la ville, luy VP de gentils hommes, par devant le roy d'Engleterre et son conseil tout parmy l'ost, en pur les chiefs et en pur les corps, leurs espées toutes nues tenans par les pointes, et les clefs de la ville et du chastel portant devant eulx en une lanche. Et quant ils vindrent devant le roy Édouart d'Engleterre et tous ceulx qui veoir les peurent, ils se mirent à genous en priant et requérant humblement merchy, en rendant la ville et le chastel, leurs corps et leurs avoirs, pour faire à la singulière volenté du roy d'Engleterre, et puis les fist le roy lever et passer oultre. Et tantost après revinrent VIII aultres hommes de Callais, IIII bourgois et IIII mariniers en pur les corps et les chiefs nuds et tous deschaux,
chascun ung cevestre en leurs cols, pour faire la volante du roy. Et quant ils vinrent près du roy, ils prinrent les chevestres en leurs mains et agenoullèrent devant le roy en priant merchy et mettant les cevestres ens leurs cols, pour faire la volenté du roy, de corps et d'avoir. Adont les fist le roy lever et les rechut en la manière que vous orez. Les chevaliers et les gentils hommes il envoia en Engleterre, où ils furent grande espasse en prison, et puis furent-ils recrus à renchon. Et les VIII furent rechargiet à monseigneur Gaultier de Mausny et à monseigneur Jehan de Beauchamp, et le chasteau et toute la ville à la volenté du roy d'Engleterre, et les ramenèrent en la ville. Et eult le roy en pourpos qu'il meteroit tous ceulx de Callais à mort ; mais la royne d'Engleterre, comme bonne dame piteuse et sage, en eult moult grant pité ; car elle les vid sy maigres, sy pâlies, syfoibles, sy descoulourës et sy fort empires du grant meschief qu'ils avoient enduret et souffert, qu'ils ne pooient plus. Sy prya et suplia tant au roy d'Engleterre, son seigneur et son mary, qu'il les respita de mort. Et pour ce le roy les fist tous widier, sans riens emporter fors ce qu'ils avoient sur leurs corps, et donna à chascun des hommes et femmes XII estrelins, et mist nouvelles gens demeurer en la ville de Callais. Dont le roy et la royne fisrent aumosne de les respiter de mort, combien qu'ils se fussent tenus contre luy, en gardant l'onneur du roy de France, de par qui ils y estoient ; car ils avoient souffert moult de meschief et enduré moult grandes famines en peu boire et en peu mengier, car ils avoient eu sy grandes disettes d'excessives et urgentes famines qu'il n'avoit demeuré en la ville cheval à mengier, ne chien, ne chat, sorris, ne rats, ne foeulles d'arbres, ne escorche d'arbres, ne herbe, jusques aux cuirs salés qu'ils rostissoient, et
cuisoient et mengoient pain de canebuise destrempé de lye de vin, que ce sambloit terre. Lequel grant meschief qu'ils souffrirent pour le roy de France, ils employèrent mal, quant il fut sy près de eulx, à tout tant de gens, sans eulx conforter. Et ainsy demoura le roy Édouart d'Engleterre seigneur de Callais, et fut l'avoir sien et à son coramand. Sy en donna et départy là où il luy pleut, et fist deffaire le pilotis du havre, et refist le port, ainsy comme devant avoit esté , et fist deffaire toutes les loges et les maisons d'entour Calais et porter dedens la ville, et y fist faire et forgier monnoye blanche et noire, et fist Calais et le chastel et toutes les fortifications remettre à point, bien renforchier et tout rapparillier.
CXLVIIIe HYSTOIRE.
Unes trêves qui furent prinses entre les II rois de France et d'Engleterre.
Tandis que le roy de France séjournoit au Pont-Sainte - Maissence et le duc de Normendie et pluseurs aultres grans signeurs, ainsy comme nous avons piècha dit, et que le roy d'Engleterre estoit encore devant Calais, fist le conte d'Erby qu'on dist de Lencastre, et ses gens, une chevauchie et course à plenté de gens d'armes et d'archiers, et de par le roy d'Engleterre, par devers Saint-Omer et Aire, ardant, gastant et pillant le pays tout environ, dont il y eult maints hommes prins, mors et navrés. Et quant le roy de France sceult ces nouvelles, il eult conseil qu'il se partiroit du Pont-Sainte-Maissenceets'en yroit à Amiens etrassamble-
roit ses gens ; car on luy avoit donnet à entendre que le roy d'Engleterre debvoit aler assiéger la ville de Saint- Omer, laquele n'estoit mye bien pourveue de vitailles, ne depluseurs choses à elle nécessaires. Et s'en revint le roy de France à Amiens environ le Nostre-Dame en septembre, l'an mil CGC et XLVII, et fist ses semonses et mandemens partout, et assambla grans gens et grande quantité de commun peuple, et manda monseigneur Jehan de Haynault et le conte de Namur. Et sy manda II cardinauls, et quant tous furent assamblés, le roy eult en conseil qu'il envoieroit les II cardinauls et aultres chevaliers parlementer aux gens du roy d'Engleterre pour avoir unes trêves, s'on pooit, pour passer l'yver. Et y alèrent les II cardinauls et aultres chevaliers avoec eulx, et firent tant qu'ils parlementèrent au conte de Norantonne et au conte d'Erby qu'on dist de Lencastre et à aultres du conseil du roi d'Engleterre. Sy y eult en ces parlemens pluseurs parolles, pluseurs demandes, pluseurs responses et pluseurs offres pour venir à unes trêves et à ung respit. Et longuement dura ce parlement, et grant paine y mist-on. En la fin tant ala-on de l'un à l'autre et à leurs consauls, que unes trêves et ung respit fut prins des II roys de France et d'Engleterre, de euls et de leurs aidans en tous pays, par terre et par mer, et que toutes marchandises courroient de l'un pays à l'autre depuis le jour Saint-Rémy l'an de grâce mil CGC et XLVII, jusques à XV jours prochains après le jour Saint-Jehan- Baptiste après ensiévant, par ainsy que le conte de Flandres ne pooit entrer au pays de Flandres, les trêves durant, ne avoir parlement par luy, ne par aultruy ou pays de Flandres. Et ainsy se départy le parlement, peu après, le merquedy et le joeudy le Saint-Luc siévant. Après rapassèrent le roy et la royne d'Engleterre ens ou pays d'Engle-
terre, et tant fisrent qu'ils vindrent à Londres, où ils se reposèrent, et firent cryer festes, joustes et tournois. Et en ce tamps tenoit en prison le roy David d'Escoce, le duc de Bretaigne Charles de Blois, le conte d'Eu et de Guingnes, le conte de Tancarville, et tous ceulx estoient prisonniers au roy Édouart d'Engleterre.
CXLVIIII* HYSTOIRE.
La mort de Loys de Bavière roy d'Allemaingne et empereur des Romains, conte de Haynault et de Rolande.
Après avint le joeudy après le Saint-Denis et Saint- Guillain l'an mil IIP et XLVII, que Loys de Bavière, roy d'Allemaingne et empereur des Romains, conte de Haynault et de Holande de par l'empereys Margueritte sa femme contesse de Haynau et de Holande, ala de vie à mort ; et estoit moult anchien, et avoit esté en moult de batailles et de grans et haulx fais d'armes à son honneur. Sy demoura de luy après sa mort de sa première femme III enfans, II fils et une fille. L'aisné de ses fils fut le marquis de Brandebourch, et le maisné le duc Estiene, et la fille eult à mary le marquis d'Euriant et de Misse. Et sy eult le dit empereur de sa seconde femme Margueritte la fille au bon conte Guillame de Haynault, de Holande et de Zëlande X enfans, V filles dont je ne sçay les noms, et V fils, dont le premier eult nom Loys et fut roy de Carlzoe et fut nés à Rome. Le second fils eult nom Guillame et fut duc de Bavière et demoroit en Holande. Le tierch des fils eult nom Aubert. Le quart eult nom le duc Otthes, et le quint Loys.
Et adont estoit la conté de Haynault et de Rolande escheue à l'empereys Margueritte de par le conte Guillarae son frère qui morut en Frise par son oullrage, et demoura l'empereys contesse de Haynault et de Holandes grant tamps en Alleraaingne puis la mort de l'empereur son raary.
Puis avint le mardy après le Saint-Martin ensiévant l'an mil IIP XLVII que monseigneur Jehan de Haynault remaria la contesse de Blois sa fille qui fut femme à monseigneur Loys conte de Blois qui morut en la bataille à Cressy. Sy en avoit des enfans, et sy eultle conte de Namur pour son second mary.
