CLI« HYSTOIRE

La mort de Philippe de Valois roy de France, et comment Jehan, son aisné fils, duc de Normendie, fut couronnés après son père comme roy de France.

Depuis ceste advenue qui advint devant Calais, sycomme vous avez oy, dont le roy de France fut moult dolent et fort raarry, et non point tant pour la perte qu'il avoit faitte que pour ce qu'il avoit fally à son entente, dont il estoit sy courouchiés que plus n'en pooit s'il ne perdoit sens et imaginer, et en quoeilla sy grande et sy griefve mélancollye que celle fut la cause et l'engendrure de quoy tantost après il morut.

Et le roy d'Engleterre rentra en son pays et emmena ses prisonniers qu'il avoit conquis en celle bataille, lesquels se tindrent en la cité de Londres jusques à ce qu'ils eurent fins de leurs rendions.

Et ainssy se passa la saison sans ce que nulle guerre s'apparust, synon en Bretaingne ; mais là guerrioit-on toudis. Et y prindrent les Englecqs en celuy tamps le chastel de Lodun qui puis fist moult de contraire au pays de Bretaiugne et aux Franchois.

Et en ce tamps trespassa Philippe de Valois, roy de France, l'an mil IIP et L, le IX^ jour d'aoust ; sy fut ensevelis en l'abbye de Saint-Denis en France.

Et fut roy après luy monseigneur Jehan, son aisnë fils, duc de Normendie, et fut consacrés et couronnés à Rains comme roy de France à grant joye, prësens tous les princes et seigneurs du royalme de France. Sy régna le roy Jehan son fils en grant fièreté de couraige et en grant volenté de luy defFendre contre les Englecqs ses mortels ennemis.

Et encore duroientles trêves entre les II roix, qui assez test fallirent.

Et en ce tamps conquirent les Englecqs la ville de Saint- Jehan-d'Angély en Poitou, et y estoit de par les François monseigneur Guy de Nielle, mareschal de France.

Maintenant nous fault parler de ce qu'il advint en celuy tamps ens es parties de Saint-Omer et de l'autre mareschal de France qu'on appelloit monseigneur Édouart de Beaugeu, et par quelle aventure il fut tués en la bataille d'Ardre et en fais d'armes.