CLIV« HYSTOIRE

Comment Charles roy de Navarre fist ochire monseigneur Charles d'Espaigne connestable de France à ce jour.

Le roy Jehan de France amoit et appétoit et très-espécialement •voloit l'onneur et avancement en celuy tamps de Charles d'Espaigne, connestable de France. Se luy donna la terre d'Angouloime, laquele estoit à Charles, roy de Navarre. Sy en eult le roy de Navarre moult grant despit ■ et luy contremanda qu'il n'en alast pas prendre la possession sy chier qu'il avoit sa vie. Et il respondy que sy feroit puisque le roy de France luy avoit donnée et que le roy estoit bien puissant assez de luy en porter paisible et de rassener le roy de Navarre ailleurs et sur aultres terres. Et sur ce monseigneur Charles d'Espaigne alla en Angouloime et en print possession de toute la terre. Et quant le roy de Navarre le sceult, il en eult grant desdaing. Sy fist espyer et attendre le connestable de France, et droit à Laigle en Normendie, au commandement du roy de Navarre, le bâcle de Maruel et monseigneur de Graville et monseigneur Fricque et moult d' aultres le jettèrent à terre et le tuèrent. Ceste ochision fist depuis maint arroy au royalme de France. Et quant le roy de France en sceult les nouvelles, il en fut moult courchiés et tant que plus ne peult : se dist qu'il seroit amendé sur le roy de Navarre.