CLV« HYSTOIRE

Comment Charles rov de Navarre fut ajourné par le roy de France à venir respondre à la Table de marbre à Paris.

Tantost après celle advenue, fut ajourné au pallais, à Paris, à la pierre de marbre, le roy de Navarre devant les XII pars de France. Et fut admis de fausseté et de trayson, et le voloit-on fourjugier de toute sa terre qu'il tenoit en France ; mais il eult tant de aydes et de consaulx que les bons moyenneurs allèrent entre deux, et tant que le roy de France se refraindy de son pourpos ; et à la pryère et requeste de monseigneur le duc de Bourbon et de monseigneur Jaques de Bourbon et de monseigneur le duc d'Orliens, le roy Jehan de France luy pardonna son maltalent. Sy demeura la chose ainsy une espasse, mais le roy de France ne pooit oublyer la mort de son connestable que tant ama. Et tondis estoient tenues les trêves entre le roy de France et le roy d'Engleterre qui ne furent point enfraintes, ne brisyes.