CLX1« HYSTOIRE

Comment Charles roy de Navarre s'en vint en Normendie en sa conté d'Evreux pour soy vengier du blâme que le roy de France luy avoit fait.

Tantost après ces choses dessus dittes, le roy Charles de Navarre s'en vint en Normendie en la conté d'Evreux qui estoit sienne, pour soy vengier de la vilonie que le roy de France luy avoit faite. Et manda au roy d'Engleterre qu'il venist hardyement à tout son ost descendre en Normendie et qu'il luy aideroit de toutte sa puissance à grever le royalme de France. Lequel roy d'Engleterre en estoit tout appresté, mais il n'eult pas le vent à point pour y aler, et luy convint retarder et séjourner grande espasse. Et ce pendant on traicta tant envers le roy de France que le dit roy de Navarre eult accord au roy de France et luy pardonna tout. Et cest accord manda et flst sçavoir le roy de France au roy Edouart d'Engleterre, à quoy le roy d'Engleterre respondy qu'il ne laisseroit jà pour ce qu'il ne venist

et qu'il ne descendist en France, et qu'il n'aroit mye ainsy travilliet ses gens pour nient. Et tost après ariva à Calais où il se aisa et reposa.

Et en ce tamps estoit monseigneur Ernoul d'Audrehem mareschal de France, et estoit à Saint-Omer, et signiffia ces nouvelles au roy de France et qu'il s'avisast sur ce.

Et quant le roy de France le sceult, il luy manda qu'il gardast, au mieulx qu'il peust, le pays et les frontières.

Adont s'en vint le mareschal de France à Ardre et se boutta dedens, et avoit avoec luy environ V* glaves.

CLXIP HYSTOIRE.

Comment le roy d'Engleterre se party de Calais et entra en France pillant, brullant et gastant le pays.

Quant le roy d'Engleterre eult une espasse séjourné en Calais, il s'en partit à tout son ost et entra au royalme de France, et son quaroy derrière qui siévoit l'ost. Et passèrent devant Guines et devant le bastille d'Ardre en laquelle le mareschal de France estoit à bien mil hommes, mais onques ne fist samblant de widier hors, car il eust bien perdut et riens gaignet. Et tost après que les Englecqs furent eslongiet environ III lieues, luy et ses gens yssirent hors et se misrent tous arengiés aux champs pour siévir tout bellement les Englecqs, lesquels s'en venoient vers Alekine en pillant et exillant le pays. Et passèrent tout oultre par pons et par passages et par rivières tout serret Terewane, et s'en vindrent jusques à Hesdin et II lieues oultre jusques au chastel de Blangy, et là se loga le roy Édouart d'Engleterre et son ost.