CLXIII« HYSTOIRE

Comment le roy de France assambla son ost pour aler à rencontre du roy d'Engleterre qui estoit près de Terewane et de Blangy.

De ces besongnes et de ces empaintes que le roy d'Engleterre faisoit sur le royalme de France, s'efforcèrent moult ceulx de Ternois, d'Artois et de Picardie et du pays environ à eulx sauver, et s'en venoient et enfermoient eulx et le leur en plus forts lieux à sauveté. Et les coureurs d'Engleterre couroient, pilloient et exilloient tout le pays, en ardant et gastant la contrée, tant que les plaintes et les cris en vinrent jusques au roy de France, qui se tenoit et estoit avallés à Amiens, et luy dist-on : « Très-noble et « très-redoubté sire, ayez pité et compassion de vos pays, « que le roy d'Engleterre art et bruist et fait destruire, et « n'est nul qui se ose mettre au devant de luy pour les « deffendre : sy y voeilliez aviser, car le meschief en « touche à vous. » Et adont esploita le roy de France ses besongnes, et fist hastivement ses semonses et ses mandemens, et se party de la cité d'Amiens à tout bien IP mil hommes, que àpied, que à cheval ; et estoit avoec luy le roy de Navarre et le daulfin de Viane, son fils, le conte d'Anjo, le conte du Maine, monseigneur Jehan de Maumez, et ses enffans, et puis le duc d'Orliens et le duc de Bourbon, connestable de France et conte de Pontieu pour celuy taraps, le conte d'Aussoire, le conte de Sanssoire, le conte de Genville et de Montventadour, le conte de Roussy, le conte de Porcien, monseigneur Jehan de Haynault, le conte de Jony, le conte de Dammartin, le conte d'Estampes et

tant de baronnie et de chevalerie que sans nombre et sans comparison. Et tous yssirent de la cité d'Amiens, au commandement du roy Jehan de France, et se misrent au chemin devers Dourlens. Et quant le roy d'Engleterre vid qu'il estoit jà bien avant en l'yver et que le roy de Franche approchoit à tout ung ost innombrable de gens d'armes, il se party de devant le chastel de Blangy, et s'en revint à Faucquembergue et à Alekine qu'il roba et puis ardist, et s'en vint à Calais à tout ses proyes, banières desployes. Et le roy de France se tint très-malcontent de ce qu'on ne l'avoit fait plus fort haster, affin qu'il eust peult rescourre les proyes et rasconsiévir le roy d'Engleterre. Et se loga le roy de France à Saint-Omer où le mareschal d'Audrehem vint assez tost après, qui avoit poursiévy les Englecqs.