CLXXVI" HYSTOIRE

Comment par l'incitation et enortement du provost des marchans de Paris le commun de la ville tuèrent monseigneur Robert de Clermont et monseigneur de Conflans et monseigneur de Buchy, tous trois marescbaux de France.

Par l'encéement, enortement, enheudissement et incitement du provost des marchans de Paris qui resgnoit pour le tamps, qui de la partye et allyance du roy Charles de Navarre estoit, se esmut le commun de Paris sur les mareschaux de France, sy loist-assavoir sur monseigneur Robert de Clermont et le seigneur de Conflans, mareschal de Champaigne, et monseigneur Symon de Buchy. Ces III furent ochis à grande confusion. Et adont fut le duc de Normendie en grant péril, mais il n'eult garde. Sy quisrent le commun de Paris moult durement monseigneur de Saint- Venant, mais il se sauva par son sens et wida Paris au plus bel qu'il peult. Et ung petit après, se party le duc de Normendie hors de Paris, et vint à Saint-Clo et là assambla sa chevalerye. Sy deffya le provost des marchans et les gens de Paris, qui moult esbahis en furent ; car il s'en vint par devant Paris et y mist le siège.

CLXXVIl* HYSTOIRE.

Comment une grande esmeulte de gens s'eslevèrent en France, qu'on appella : Jacques de Beauvosis ou aultrement : Jaque Bon homme.

Tandis que le peuple et commun de Paris estoient sépares et divisés de l'amour et obéyssance des seigneurs, et que le duc Charles de Normendie estoit et tenoit siège devant et autour de Paris, en ce tamps s'esmeurrent et eslevèrent et meutinèrent ens ou royalme de France une manière de gens fols, robustes, brutaux, inhabilles et édyos, qu'on nommoit : Jaque Bon homme. Et vindrent premièrement du Beauvoisin, et s'assamblèrent et coupplèrent une moult grande quantitet ensamble, et avoient et tenoient ung très-mauvais, trèspérilleux et très-mal fondé argut en eulx ; car il voloient ochire et destruire tous les gentils hommes de France et abattre touttes leurs forteresses, et s'en misrent en paine, et se travillèrent et penèrent pour ce faire. Et en ce contendant, gastant et abatant pluseurs belles, bonnes et fortes places ens ou royalme, et en exillant et pillant, et tuant pluseurs seigneurs, chevaliers, escuiers, nobles et gentils hommes, ils firent moult d'aultres et exécrables et innombrables maulx ; mais, en la fin, le roy de Navarre et ses gens alèrent à rencontre de eulx et les tuèrent, pendirent, noyèrent et destruisirent tous.

Maintenant nous fault retourner à ceulx de Paris et au duc de Normendie qui les tenoit assiégiés.

CLXXVIIIo HYSTOIRE.

Comment le commun de Paris et les bourgois de la ville envoièx'ent querre Charles roy de Navarre pour les aidier contre le duc de Normendie qui les tenoit assiégiés, et le tindrent léens à leurs saudées;

Quant ceulx de Paris perchurent que le duc de Normendie les avoit assiégiés et durement les menachoit et ne les voloit prendre à raerchy s'on ne luy délivroit le provost des marchans et XII bourgois tels qu'il les vorroit prendre et eslire en la cité, à faire sa volenté, sy en furent moult esbahis, car adont ils aymoient moult chièrement le dit provost : sy ne se pooient accorder, ne assentir ad ce faire. Sy eurent en leur advis et en leur conseil (et à ceste délibération se tindrent), qu'ils manderoient le roy Charles de Navarre, et luy délivreroient or et argent pour eulx aidier et defFendre contre le duc de Normendie. Sy le mandèrent, et il vint, et, luy venus dedens Paris, on luy dist et requiston qu'il les volsist defFendre contre ledit duc, et on luy délivreroit or et argent pour luy et pour tous ceulx qu'il tenroit. Et le roy Charles de Navarre leur accorda, et mist adont dedens Paris bien V" Englecqs saudoyers, lesquels defFendoient et gardoient la cité contre ledit duc. Et le roy de Navarre s'en vint à Saint-Denis et se tint droit là, et grant planté de saudoyers avoecques luy ; et luy envoioit-oa toutes les sepmaines de la cité de Paris la somme de V'' moutons franchois, et tant avoit-il pour ses gages.

CLXXVIIII« HYSTOIRE.

Ung traictiet que fist la royne blanche, l'évesque de Paris et l'évesque de Troyes entre le roy de Navarre, le duc de Normendie et ceulx de Paris.

Entandis que le siège estoit devant Paris, se fist ung traictiet entre le duc de Normendie, le roy de Navarre et ceulx de Paris ; et tendit-on assés près de Paris III tentes, par ung jour de l'Ascension, l'an de grâce mil CGC et LVIII : lequel traictiet raoyennèrent la royne blanche, nommée Jehenne , 1 evesque de Paris et l'évesque de Troyes. Sy se composèrent , disposèrent , proposèrent , apposèrent, exposèrent et pactionnèrent telement ensamble, que le duc Charles de Normendie s'acorda et racorda à ceulx de Paris et au roy de Navarre ; mais non pour quant ne volut onques le duc entrer dedens Paris, tant qu'il sentesist le provost des marchans en vie, qu'il eulst pardonné son maltalent, de quoy le provost en estoit moult courchiés.