VII« HYSTOIRE

Ung commenchement de guerre qui se causa entre le roy Philippe le Bel et le roy Edouart d'Engleterre.

Ainsy et par cette occoison que vous avés desus oy, commencha celle guerre en mer, de quoy avindrent maints domages aux gens du roy Philippe le Bel de France. Sy en vindrent les plaintes au roy Philippe, et par le conseil des barons de France fist adjourner le roy Edouart qui son homme estoit, et sy avoit sa suer en mariage, et sy tenoit de luy Gascongne et Pontieu, qu'il fusist dedens les XV jours après l'ajournement par devant luy pour ses mefFais faire amender ; mais le roy Edouart n'eult point conseil d'y comparoir, ne venir avant, pour quoy le roy Philippe saisy sur luy Bordeaux et Pontieu. Et quant le roy Edouart le sceult, il envoia monseigneur Aymon son frère qui avoit à femme la royne de Navarre. Et monseigneur Aymon y fut moult conjoïs, mais il ne peult trouver accord qui aux II roix pleusist. Sy s'en retourna en Engleterre. Et quant les Englecqs sceurent qu'il fut revenus , ils recommenchèrent la guerre par mer et tollirent aux marchans de la terre du roy Philippe IIII" nefs normandes chargées de grant avoir. Et assés tost après le roy Edouart envoia II Jacobins au roy Philippe et renvoya par eulx la perte et rendit au roy Philippe homage, amistë et linage.

KECITS.