VIII« HYSTOIRE

Comment le comte Charles d'Anjou, frère du roy Philippe de France, alla en Gascongne.

Quant le roy Philippe vid et sceult la volenté du roy Édouart, il eult conseil sur ce. Sy envoya monseigneur Charles d'Anjou ^ son frère pour saisir Gascogne que le roy Édouart devoit tenir de luy.

Ceulx de Bordeaux rendirent la ville à monseigneur Charles ; mais ceulx de Biaves, ne ceulx de Montauban ne se volurent à luy rendre ; et quant monseigneur Charles vid ce, il assaly Biaves, et avoit avecques luy le conte de Fois, le mareschal de Mirepoix et moult d'aultres gens d'armes, mais ceulx de Biaves se defFendirent sy vigoreusement que monseigneur Charles y sist et tint siège ung espasse de tamps. Et entretant vindrent le conte de Herefort, monseigneur Jehan de Bretaingne, monseigneur Guillaume de Mortemer, monseigneur Jehan de Saint-Jehan, à plenté de gens d'armes, pour secourre ceulx de Biaves de par le roy Edouart.

Ceulx gens d'armes eurent maintes et fortes escarmuches aux gens de monseigneur Charles qui tenoit siège devant Biaves. Et quant monseigneur Charles vid ce, il envoia en France querre secours, et le roy Philippe fist apparillier grant navie et assambler à Bruges. De celle navie furent conduiseurs le sire de Harcourt et le sire de Monmorensy, mais peu y esploitèrent, car le roy Édouart desconfit en ce

(1) Charles de Valois.

point le roy d'Escoche qui s'estoit allyés au roy de France et le tint grant tamps en prison, et puis s'en retourna le roy Édouart en Engleterre.

Et tandis que le siège estoit devant Blaves, grant plentê du commun de Bordeaux se rebella et meutina contre monseigneur Charles, et yssi grant party de ce commun hors de la ville pour luy venir courre sus en son siège, et eult monseigneur Charles bataille à eulx, et en y eult moult de mors et de navrés d'une part et d'aultre, par quoy monseigneur Charles se retira en Bordeaux par le moyen de aucuns de ceulx de la ville et de ceulx qui demourés y estoient en garnison de par luy. Et les rebellans se retrairent à Saint-Sever.

En ce point envoia le roy Édouart monseigneur Aymon son frère à plenté de gens d'armes à Blaves. Et quant monseigneur Charles le sceult, il envoia querre secours en France, et le roy y envoia le conte Robert d'Artois et grant plenté de gens d'armes. Et monseigneur Charles retourna en France et laissa le conte Robert d'Artois devant Ryon, qui bien se maintint en Gascongne et hardiement.

En ce tempore demanda le roy Édouart d'Engleterre à Guion conte de Flandres Philippe sa fille pour Edouard son fils prendre à femme. Et quant le conte oy ces nouvelles, il en fut moult liés et moult joyeulx, et respondy aux embassadeurs et messages du roy qu'il luy ottroyoit volentiers, comment que nul mal n'y pensoit ; et furent les affiances prises ; et puis s'en retournèrent les embassadeurs en Engleterre. Et quant le roy Édouart le sceult, il en fut moult joyeulx, et moult en prist la pucelle à en amer.

UÉCITS. 91