XXXV« HYSTOIRE

Le mariage du josne roy Édouart d'Engleterre et de Yzabel la fille de Philippe le Bel roy de France.

Après ces choses ainsy advennues comme dessus vous avons dit, advint que le roy Philippe de France exploita, diligenta et pourcacha tant devers Édouart roy d'Engleterre que le mariage et accointage fut fait entre Yzabel sa fille et Édouart le josne roi d'Engleterre son fils, dont nous vous avons chy-dessus parlé. Et en furent les nopces faites à Boullongne-sur-la-mer à moult grant joye et à grant feste. Et là fut en la presse Hue le conte de Soisson estaint en l'an mil IIP et IX, et puis, après la solempnité, les danses, joustes, behours, tournois, esbanois et touttes manières de joyeuseté faites à l'occasion de ce mariage, emmena le josne roy d'Engleterre Yzabel sa femme oultre mer. Et peu après morut le roy d'Engleterre son père, et demoura à Édouart son fils le royalme d'Engleterre, et en fut roy.

Sy eult de sa femme Yzabel ung fils qui, comme son père et son grant-père, eult nom Edouart, le bon, le hardit et l'entreprenant, sy comme vous orez chy-après en pluseurs lieux parler de ses proesses, vaillances et grans hardyesses. Et depuis le trespas de la royne Yzabel, il eult à femme Philippe la fille du conte Guillame de Haynault, de Holande et de Zélande.

Le roy Édouart eult II suers dont l'une eult en mariage le roy David de Brus d'Escoce, et l'autre suer eult à mary le duc de Guéries.

Sy lairons ung petit à parler de eulx et retournerons au roy Philippe de France et au conte de Flandres.