XXXVI* HYSTOIRE
Le mandement que fist Philippe le roy de France au conte de Flandres.
Après ce mariage ainsy fait comme dessus oyt avez, avint une espasse de tamps après que le roy de France êult conseil qu'il mandast au conte Robert de Flandres qu'il avoit grant merveille pour quoy il n'avoit relevé la conté de Flandres puis la mort de son père, et que par ce point il avoit sa terre fourfaitte se les pers le jugoient et qu'il s'en venist defFendre en dedens VII jours qui mis y furent. Lequel monseigneur Robert apparilla son conroy et alla à Paris moult noblement par devers le roy ainsy qu'il appertenoit à luy, et s'en vint par devant le roy et son conseil, et s'agenoulla et dit : « Sire, je suis venus à vostre mand ; « et sy m'avez mandé que vous avez grant merveille pour « quel cause je n'ay relevé la conté de Flandres que je
« tiens de vous. Chier sire, je respons ainsy devant vous « et devant tout vostre conseil qui me peut oyr cy endroit, « que quant vous me arez rendu Lille et Douay et che qui « fut mis en gaige à la paix qui fut faitte devant Lille « après la bataille du Mont-en-Peules pour XL mille « livres de gros., en quoy mes bonnes gens s'obligèrent à « payer, laquelle somme d'argent a esté bien paye de moy « et de mes gens à vostre commandement. Sy vous requiers « par devant vos hommes que je raye mon gaige et que « droit m'en aviengne. Et après ce je suis celuy qui volen- « tiers releveray de vous ma conté par l'ensaignement et « sentence de tous vos pers. »
Et adont respondirent et demandèrent Charles de Valois et Loys conte d'Évreux, frères au roy, à quy et quant la somme d'argent avoit esté paye au nom du roy.
Et monseigneur Robert conte de Flandres respondit et leur dit qu'on l'avoit paye et baillye à monseigneur Enguerant de Marigny qui est en présent et au commandement du roy.
Adont crolla monseigneur Charles la teste en regardant le conte d'Évreux et dist que c'estoit bien des faits d'Engherant de Marigny. Et adont y eult plusieurs grosses paroUes dittes.
Sy fut une journée prinse pour estre en la ville d'Aras. Et là debvoit chacun amener ses preuves de ce qu'ils avoient à faire l'un contre l'autre. Et quant le jour du parlement fat venu, monseigneur Enguerant de Marigny vint à Aras avoecques ceulx de son conseil, lesquels ne hainghoyent, tendoient, ne cachoient fors que à monseigneur Robert prendre et mettre en prison.
Et quant monseigneur Robert le sceult, qui estoit en Aras en son ostel et qu'on avait apparilliet pour le disner,
il laissa tout quoy par son conseil et monta à cheval et s'en alla vers Flandres à tout ses gens. Dont pour ycelle assignation de journée et pour ce payement advinrent puis maints maulx et maintes assarablées à Tournay et ailleurs et à l'ost qu'on dit moullie sy comme vous orez chy-après, et tout par monseigneur Enguerant de Marigny.
Sy lairons de eulx ung peu à parler tant qu'à présent.
