XLVIII* HYSTOIRE

Comment la royne Yzabeau d'Engleterre vint querre secours en Haynault pour ce qu'on l'en avoit fallit en France.

Quant la royne d'Engleterre fut partye hors de Paris, elle chemina tant entre luy et ses gens qu'elle vint à Valenchiennes. Sy enquist et demanda où le conte de Haynault estoit ; et on luy ensaingna. Et quant elle vint vers le conte Guillame de Haynault, de Holande et de Zélande, elle fut rechue moult honnourablement et à grant joye, et le josue roy ossy et pareillement son oncle. Et séjourna au pays de Haynault une espasse de tamps. Et puis s'acointa sy bien de monseigneur Jehan de Haynault et de ses chevaliers, et tant leur conta et enditta de sa besongne en dépriant et requérant de leur ayde que monseigneur Jehan luy eult en couvent de aidier de tout son sens et son pooir.

Et adont fist monseigneur Jehan semondre et requérir pluseurs des chevaliers de Haynault et d'ailleurs tant qu'il

en eult bien X banerets sans les bacelers. Et quant ils furent bien assamblés, ils se trouvèrent VIP healmes de bonnes gens.

Dont se mist monseigneur Jehan et sa routte à la voye et emmena la rojne Yzabel et le josne roy d'Engleterre son fils et son oncle, et montèrent en mer au lez devers Holande, et se commandèrent à Dieu et à monseigneur saint Jorge qu'il les menast ariver à bon port. Et nagèrent tant qu'il arivèrent en Engleterre à grant péril en ung lieu désert ; car le roy d'Engleterre le père et grans gens d'armes estoient au pas où la royne et ses gens voloient et cuidoient descendre, et luy avoit-on nonchiet que tels gens debvoient là ariver, mais il ne pleut mye à Dieu ; et dès dont ouvra Dieu pour Édouart le josne roy d'Engleterre.

Et quant ainsy furent arivés luy et ses gens, il y avoit avoec la royne des gens qui bien sçavoient la raison d'Engleterre, lesquels fisrent tant qu'ils menèrent le josne roy et la royne en plain pays d'Engleterre au mieulx qu'ils peurent et tout l'ost. Et eurent moult de disettes avant qu'ils y fussent. Toutesvoies, quant ils furent entrés au plain pays, ils trouvèrent que le josne roy et la royne avoient des bonnes villes d'acord et qui bien les araoyent.

Adont fist tant monseigneur Jehan de Haynault et ses gens, avec l'ayde de Dieu et de ceulx du pays, que le roy d'Engleterre le père qui mal à point avoit ouvré envers la royne sa femme et son fils et son frère et sur le conte de Kam, fut prins par force et mis en prison dont puis n'issy. Et Hue Le Despensier fut trainé et pendut et coppés en IIII quartiers, et les quartiers pendus aux IIII pors des IIII villes d'Engleterre, et la teste fut mise en ung cercle "de fer et pendue sur le pont à Londres.

Assés tost après morut le roy d'Engleterre le père en

prison ainsy que Dieu scet bien. Et adont fist monseigneur Jehan de Haynault Edouart le josne roy chevalier et luy donna la collée ou non de Dieu et de monseigneur saint Jorge en l'église à Waymoustier. Et puis après vint l'évesque de Durâmes et monseigneur Jehan de Haynault et luy misrent la couronne au chief et le couronnèrent comme roy d'Engleterre à grant ioye et à grant solempnité, et moult y donna-on de beaux dons et de riches.

Et ainsy demoura la royne Yzabeau qui estoit belle dame et puissante, en son honneur et en son douaire.

Et après ces choses print monseigneur Jehan de Haynault et ses gens au roy et à la royne sa mère congiet, et à tous les barons d'Engleterre ; et se partirent et montèrent en mer, et fisrent tant qu'ils vindrent en Haynault où ils furent rechups en grant joye en l'an mil HP et XXVI.