LXXII«= HYSTOIRE

Comment monseigneur Thiébault de Moreul et la garnison de Cambray, avoec eulx le serment des arbalestriers et moult de commun de la ville, alèrent ardoir les fourbours de Cymay et aultres villes.

Or avint après ce que le chastel de Relenghes fut ars et abatus et que ceulx qui dedens estoient, s'en furent aies, en la sepmaine du Noël après siévant, se party monseigneur Thiébault de Moreul et ses gens, et avoec luy le maistre des arbalestriers et grant plenté de ceulx de la cité de Cambray, et s'en allèrent vers le Terrasse environ Cymay pour faire à monseigneur Jehan de Hainault despit et porter domage. Et ardirent les fourbours de Cymay et pluseurs villes.

Et puis y revint monseigneur Jehan de Vervin qu'on dist Bomont, à grant plenté de gens d'armes, et ardirent sur le dit monseigneur Jehan de Haynault tout en courant sans garder les feux, dont monseigneur Jehan de Haynau fut moult courchiés, mais il luy convint souffrir ce domage et ce honte à la pryère du conte de Haynaut son cousin. Et quant il eult tant souffert, il s'en plaindit à aucuns de ses amis et à monseigneur Guillame conte de Haynault mesmes.