LXXIII« HYSTOIRE

Comment monseigneur Thiébault de Moreul et ceulx de la ville de Cambray brûlèrent et pillèrent la ville de Haspi-e.

Après il avint qu'en ee despit faisant au dit monseigneur Jehan de Haynault, yssit de rechief monseigneur Thiébault de Moreul et toutte la ville et les arbalestriers de Cambray à banières desployes ; et ardirent et desrohèrent la ville de Haspre, le dimence au matin après le myquaresme l'an de grâce mil IIPXXXIX, de quoy le conte Guillarae de Haynault qui estoit adont à Valenchiennes, fut moult courchiës.

Dont, en peu de terme après, le conte de Haynault manda deffiance au roy Philippe de France son oncle par l'abbé Thiébault de Crespin, lequel y ala bien et hardyement.

LXXIllI* HYSTOIRE.

Comment le conte Guillame de Haynault et monseigneur Jehan son cousin prinrent Aubenton et ardirent le pays environ.

En tandis que le conte de Haynault envoia defSances au roy Philippe de Valois son oncle de par le dit abbé de Crespin, assambla le conte de Haynault et monseigneur Jehan de Haynault sire de Beauraont grant plenté de bons gens d'armes tant qu'il eult bien X mille bachines. Et sy y fut le sire de Kuk ou lieu du duc de Brabant, et chevau-

chèrent parmy le Terrasse tant qu'ils vinrent à Aubenton une bonne ville où on fait bonne drapperye, en laquele ville y aroit grant plenté de gens d'armes de par le roy de France pour la ville garder, et sy y estoit le sire de Vervin. Et quant le conte de Haynault et ses gens furent venus devant la ville et qu'ils eurent avisé et regardé auquel lez il feroit milleur à assallir, il fit cryer alarme et assalir vistement. Et luy-mesmes son propre corps ala à l'assault. Et là veyssiez trompes et nacaires et cornemuses sonner et retentir, et vigoreusement assallir, et ceulx dedens à eulx deffendre au traire et au jetter, et pluseurs en veyssiez combatre main à main. Et là eult grant assault et mervilleuse bataille. Là furent maints hommes navrés, blechiés et tués, et avoit dedens la ville grant noise et grant crierie de femmes et d'enfans. Sy s'enfuirent pluseurs chevaliers de la ville, qui y estoient en garnison, car l'assault y estoit grant, craintif et moult périlleux et qui très-longuement dura.

En la fin fut la ville prinse par force et toutte pillye, et pluseurs emmenés pour renchouner ; et puis boutèrent le feu par toutte la ville, et moult y eult grant gaing, car la ville estoit moult riche. Et encacha monseigneur Jehan de Haynault ses ennemis vers Vervins en eulx tuant et prenant.

Et sy ardisf-on Maubier-Fontaine, Aubenceul, Signy-le- Petit, Wargny, Bucielles et bien XL villes à clocquiers environ le pays.

Et ainsy se venga monseigneur Jehan de Haynault du despit et du demage qu'on luy avoit fait en son pays. Et puis se party le conte de Haynault et monseigneur Jehan son oncle à tout leurs gens, et s'en retournèrent en leurs lieux.

Et après ce s'en alèrent monseigneur Guillame de Haynault et monseigneur Jehan son oncle et le duc de Brabant et les Flamens au parlement à Tenremonde.

Et en dementiers le roy de France s'avala à Aras et environ à tout son ost, et le duc de Normendie et ses gens firent leur assarablée environ la cité de Cambray pour aler courre sur Haynault.